Adlaw sa mga Santos malinawon — PNP

CEBU, Philippines - Gihulagway sa kapolisan nga malinawon ang adlaw sa pagtimaan sa Adlaw sa mga Santos kagahapon ug malaumon silang magpadayon kini karong adlawa nga adlaw na usab sa mga minatay. Sa siyudad sa Sugbo, dunay gipamutang nga 18 ka mga close circuit television (CCTV) sa lima ka mga dagkong sam-ang nga mao ang Carreta, Cempark, Queen City Gardens, Calamba ug Pardo.

Matud pa sa hepe sa kapolisan sa dakbayan sa Sugbo nga si Sr. Supt. Melvin Ramon Buenafe malinawon ang adlaw sa mga santos bisan pa man sa kadaghan sa naghugop nga tawo.

Gibutyag usab ni Buenafe nga itandi sa una mas gamay ra ang ilang nakompiskar nga mga hinagiban sama sa tigib ug gunting nga gamit sa pagpanglimpyo sa nitso, samtang ang mga ilimnong makahubog gamay ra usab sila og nakompiska niini.

Samtang ang hepe sa CCPO-Operations Branch nga si Chief Insp. Wildemar Tiu mibutyag usab nianang pagkahapon nga kapin na sa 20 mil ka tawo na ang misulod sa Cempark kini base sa ilang monitoring sa mga CCTV cameras.  Gipaabot ni Tiu nga musamot kadaghan ang tawo karung adlawa tungod sa pagtimaan sa Adlaw sa Patay.

Samtang ang operations head sa Emergency Rescue Unit Foundation (ERUF) nga si Medardo Batiller mibutyag nga ang dehydration maoy sagad nga gimulo sa mga tawo tungod sa kainit sa panahon, matud pa niya kinahanglang moinom og daghang tubig ang mga tawo. Samtang susamang kalinaw usab ang nasinati sa mga nagkadaiyang sam-ang sa dakbayan sa Lapulapu ug sa Mandaue.( /EIM) (BANAT NEWS)