Panagribal sa negosyo gisusi sa pag-ambush sa 2 Koreano
CEBU, Philippines - Giingong panagribal sa negosyo maoy hinugdan nga motibo sa pagpang-ambush sa duha ka mga Koreano niadtong Miyerkules sa buntag sa Barangay Pajac, Lapu-Lapu City diin samdan sila si Lee Dong Gun, 46, ug Jung Ha Bok, 40.
Si Supt. Rey Lyndon Lawas, acting city director sa LCPO, wala na mohatag pa og dugang detalye sa ilang imbestigasyon apan siya nagduda nga ang mastermind sa maong pagpangatake posibleng usa usab ka Koreano.
Si Gun ug Bok, business partners sa usa ka souvenir shop sa dakbayan. Sila usab ang giingong nanag-iya sa Yellow Submarine, usa ka underwater tour nga negosyo.
Si Lawas mibutyag nga base sa mga testigos nag-inusara ra ang gunman apan sa nakuha nila nga footage sa close-circuit television camera aduna kini kauban.
“Naay usa ka accomplice nga nakuha nga possible i-apil nato sa filing sa kaso,” matud ni Lawas.
Kasong frustrated homicide ipasaka batok sa mga gikatahapan karong Lunes diha sa Lapu-Lapu City Hall of Justice.
Sila si Gun ug Bok sakay sa puti nga Dodger Durango (OSK 888) dihang gipaulanan og bala sa suspetsado. Si Gun nakaangkon og samad pinusilan sa walang bukton ug si Bok sa walang kamot.
Lima ka basiyo sa kalibre .45 pistol ug usa ka slug sa .38 kalibreng bala ang nakuha sa kapulisan.
Ang security guard sa Pacific Villa subdivision nakapabuto pa sa mga suspetsado apan dali na kining nakasibat sakay ang pula nga motorsiklo.
Nasayran sa Banat News nga manggihatagon ang mga biktima sa ilang mga silingan diha sa subdibisyon.( /EIM) (BANAT NEWS)
- Latest
