Matag sam-ang may public assistance desk

CEBU, Philippines - Ang kapolisan sa dakbayan sa Mandaue magbutang og “public assistance desk” sa matag sam-ang sa Mandaue karon  ug ugma.

Ang bag-ong natudlo nga Mandaue City Police Director Senior Supt. Petronelli Baldebrin miingon atol sa press conference  nga iya usab nga ipakatap ang mga kapolisan  sa mga “crime prone areas”.

Siya midugang nga iya usab nga gi-assign ang K-9 unit diha sa North Bus Terminal aron masiguro nga walay “explosive device” ang makalusot.

Ang public assistance desk sa matag sam-ang dili mawad-an og polis ingon man mga barangay tanod ug uban nga mga volunteer civilian groups aron daling maatiman ang mga yangungo sa katawhan.

Adunay unom ka mga sam-ang sa dakbayan sa Mandaue, duha gipanag-iya sa Katolikong simbahan, ang St. Joseph Catholic Cemetery sa Barangay Guizo ug ang Katoliko Romano cemetery sa Barangay Pagsabungan, ang Municipal Cemetery sa Barangay Guizo ug tulo ka memorial park, ang Manpark ug Grosmar sa Barangay Guizo ug ang Angelicum sa Barangay Pagsabungan.

Mipahimangno usab si Baldebrin nga gidili ang pag-inom og makahubog nga ilimnon  sa mga sam-ang ingon man ang kusog nga sound system kay kini maka-disturbo sa pag-ampo sa mga tagtungod  sa  mga  gilubong.

Sa laing bahin mipahibalo si Ret. Maj. Edwin Ermac, hepe sa Traffic Enforcement Agency of Mandaue (TEAM) nga ang mga motorista dili makasulod sa dapit nga “No Entry.”  Apan ilang gitagana ang daplin sa kadalanan nga libre nga parking area sa  mga  sakyanan. (BANAT NEWS)