Plantasyon sa kape giugmad sa DENR

CEBU, Philippines - Ang Department of Environment and Natural Resources (DENR)7 uban sa Ubay Federated Tree Planters Association Inc. (UFTPA) miatiman og usa ka ektaryang plantasyon  sa kape nga may 1,500 ka punoan sulod sa 16 ka ektaryang kalasangan sa San Pascual, Ubay, Bohol.

Ang maong proyekto  maoy  pagtuman  sa DENR Agro Forestry Development Project nga giabagan  usab  sa  UFTPA kansang  tinguha  mao ang  paghatag og benepisyo sa komunidad dili lamang  sa mahimong  kinitaan  gikan  sa produksyon  sa kape  kundili ingon  man  sa programa  nga  National Greening Program (NGP)  sa kagamhanan. Ang San Pascual Agro Forest sa Ubay kabahin  kini sa 20, 749 ka ektarya luna  sa goberno  nga  anaa  sa sulod  sa Carood Watershed Model Forest (CWMF).

Matud pa ni DENR-7 Regional Executive Director Dr. Isabelo Montejo nga gawas sa pagpausbaw sa kamalahutayon sa maong model forest, ang plantasyon  sa kape makatabang usab sa pagpauswag sa socio-ekonomikong kondisyon sa katawhan nga nanimuyo dapit sa watershed.

Sa susamang kalamboan, ang Philippine Mining Service Corporation (PMSC) uban sa Bohol Limestone Corporation (BLC) sa Garcia Hernandez, Bohol nakatanom na og dul-an sa 7, 542 ka lumad  nga  mga  kahoy  nga mitaklap sa 38.6 ektarya sulod dapit sa mining contract area  niini.

Agi og suporta sa NGP, ang Vice Mayor League of Bohol mopirma og Memorandum of Agreement (MOA) aron makahatag og amot nga P100,000 ngadto sa UFTPA nga gamiton alang sa paghatag og dugang mga  igtatanom  nga mga punoan  sa kape  aron mapalapad  pa ang coffee plantation sa maong  lugar.

Gibutyag ni Montejo nga pinaagi niini ug sa aktibong pagpakigduyog   sa nagkadaiyang magpapatigayon, dugang panginabuhi pa unya ang pagabuksan ilabi  na  kun molampos ang  proyekto  nga  gipasiugdahan  sa DENR alang  sa  NGP  program. (BANAT NEWS)