3 ka suspetsadong tulisan tiklo

CEBU, Philippines - Tulo ka menor de edad kinsa gipasanginlang nanulis og laing menor de edad  nasikop sa mga polis didto sa barangay Candulawan, dakbayan sa Talisay, niadtong  Martes  sa gabii.

Ang mga suspetsado usa niini nagpanuigon og 16-anyos samtang ang duha nagpanuigon og 17-anyos, kansang  mga ngalan  gipugngan sa Banat News. Ang tulo nasikop nila ni PO2 Aquiles Cabando ug PO2 Romualdo Torregoza uban sa kapitan, kagawad ug mga tanod sa barangay.

Ang biktimang si Vierne Tan, 16- taga sitio Cabangcalan, barangay Bulacao, dakbayan sa Sugbo mi-report ngadto sa barangay hall sa Candulawan human siya  tulisa sa tulo sa ala 1:30 sa hapon  niadtong  Martes  didto  sa sitio Riverside, Candulawan, dakbayan sa Sugbo.

Nadala sa maong mga tulisan ang iyang kolor puti nga Cherry Mobile nga cell phone  nga nagkantidad og P1,500 ug Sandugo nga tsinelas nagkantidad og P300.

Giingong usa sa maong mga tulisan maoy mition og pusil ngadto sa biktima.

Ang mga opisyal sa barangay  nangayo dayon og panabang sa mga polis kinsa  diha-diha  mipahigayon dayon  og  hot pursuit operation.

Ang tulo ka mga suspetsado didto  masikop sa usa ka payag nga nahimutang sa Pacific Heights, sa Candulawan, Talisay nga gipanag-iya ni Isidro Pacada.

Hinuon  ang cell phone  sa biktima nasakmit  sa kapolisan  gikan  sa  mga suspetsado  apan ang tsinelas wala na hikit-i.

Ang mga suspetsado gikustodiya  sa  kapolisan  nga andam  usab  nga ihandus  ngadto  sa buhatan  sa Department of Social Welfare and Development. (BANAT NEWS)