Mag-uuma gipusil sa kontra kritikal

CEBU, Philippines - Kritikal ang kahimtang sa   usa ka mag-uuma human kini  pusila sa kontra samtang naglakaw paingon sa iyang umahan didto sa barangay Candabong lungsod sa Alcantara niadtong Martes sa alas 3:00 sa hapon.

Ang biktima mao si Dalmacio Ungria Jr., 49, minyo, molupyo sa maong lugar, ug usa ka mag-uuma.

Samtang ang suspek mao si Etchel Sabandal, hingkod, ulitawo apan adunay kapuyo ug molupyo sa barangay Basdiot lungsod sa Moalboal. Si PO3 Ludiveno Odever sa Alcantara Police Station mibutyag  sa Banat News  nga  ang bitkima naglakaw nga  walay  kalibotan  nga giatangan siya  sa dalan  paingon  sa iyang  uma.

Sa pag-abot niya sa  mingaw  nga  lugar  sa dalan kalit  lang  mibabag  sa iyang agianan  ang  suspetsado  dayon  milanit  sa armas de fuego niini ug  gipusil  siya nga nag-atubang sa suspek.

Maayo  kay  nakalihay  siya  og  dyutay hinungdan  nga ang  wala  ra  niya  nga abaga  maoy  naigo  sa bala.

Ang suspek nga di pa praktisado sa pagpamusil, natarantar hinungdan nga  pagkamatngon niyang naigo  ang  biktima  wala  na  niya  usbi  og  pusil.

Giingong  mikaratel  kini  og  dagan  pahilayo  sa maong  lugar samtang  ang  biktima  dali  usab  nga gihatod sa mga nakaagi  kaniya ngadto sa  Alcantara Rural Healh Center apan gi-transfer usab dayon sa tambalanan sa dakbayan sa Sugbo.

Sa imbistigasyon sa kapolisan  nasuta  nga  personal nga bangi ang motibo sa krimen  ug padayon pa nga gipangita sa kapolisan  ang suspek. (BANAT NEWS)