Pagsira sa agianan gikagubtan sa katawhan

CEBU, Philippines - Duha ka  mga kaso  sa pagpanira  sa agianan gikagubtan sa mga  molupyo sa duha ka managlahing  lugar  sa dakbayan  sa Sugbo  niadtong  Martes.

Si  Mayor Michael Rama dali  nga  miresponde sa kagubot sa usa  ka  lugar  sa Barangay Lahug niadtong Martes sa gabii dihang ang mga molupyo  buot  nga makigsambunot sa tag-iya  sa  usa ka pribadong  luna kinsa mipasira sa agianan niini sa may   Gorordo Avenue.

Si Mario Espinosa miadto  kagahapon sa buhatan  ni Mayor Rama sa City Hall ug didto  gihangyo siya sa mayor  nga  unta hatagan  niya  og  “right of way” ang mga apektado nga  namuyo  sa maong  dapit.

Gibutyag ni Espinosa ngadto kang Rama nga legal ang iyang pagpasira  sa agianan  kay may  permiso  sila gikan  sa   Office of the Building Official (OBO) nga nagtugot kaniya sa pagkoral  sa maong  dapit.

Apan  matud pa  ni Rama nga  sa  iyang  pag-inspection  sa maong  lugar, iyang nakita ang right of way alang sa mga nagpuyo sa  Sitio Sta Catalina ug San Vicente, nga layo kaayo nga  lakawon  paingon sa main road.

Busa temporaryo nga gisuspenso  sa OBO ang  permiso ni Espinosa  ug  gimando  ni  Rama  ngadto  kang Cebu City Police Director Melvin Ramon Buenafe nga padestinohan  og mga polis ang maong  dapit aron dali ra kini nga makaresponde kung adunay  kagubot.

Samtang  sa laing  bahin  didto sa bukirang bahin sa barangay Tisa  mitumaw usab ang susamang  kaguliyang  sa mga  molupyo  sa duha ka  subdivision  sa maong  dapit  dihang usa  sa  mga tag-iya  sa luna  mipasira  usab  sa agianan   sa  katawhan nga  nahimutang  sa iyang  lote.

Giila ni Kapitan Eddie Cabulao  ang  maong tag-iya  nga si Susab Banlasan nga maoy gikuninitan sa mga pagdumot ug kasuko sa mga  nanagpuyo sa Napa Hills ug Lower South Hills sa maong  barangay.

Matud pa ni Cabulao  nga  gipatak-opan  ni Banlasan  ang  maong  agianan   kay gusto niyang pabayron ang  kagamhanan  niini.

Sa pagkakaron anaa na sa lamesa  ni Mayor Rama ang hangyo ni Banlasan  nga pabayran ang maong  agianan  sa kagamhanan  sa siyudad. (BANAT NEWS)