Communication network tukoron sa Capitol ug VSMMC

CEBU, Philippines - Usa  ka communication network  ang  gilaraw  sa kagamhanan  sa lalawigan  uban  sa Vicente Sotto Memorial Medical Center (VSMMC) aron makarespondi  dayon  sa  panahon  sa emerhensya.

Gibutyag  ni Dr. Gerardo Aquino, Medical Director sa VSMMC nga mao  na  kini  ang  gisabotan  nila  ni  Governor  Gwendolyn Garcia  ug Dr. Cristina Giango sa Integrated Provincial Health Office (IPHO).

Matud  pa  niya  nga ang  tumong  niini  mao  ang pagtukod  og  direkta  nga  linya sa komunikasyon sa tanang mga tambalanan dinhi sa Sugbo uban  sa  mga rescue  team aron  makatubag  dayon  sa  panahon  sa  dinaliang  panginahanglan  sa mga molupyo  nga  may mga pasyente .

Midugang   si Aquino nga sa panahon nga ma -establisar na unya ang maong communication network daghan  na  nga  kinabuhing  masalbar  kay  may  makatambal  man  dayon niadtong  anaa  na  sa talandugong  kahimtang  sama  sa  mga madisgrasya  sa kadalanan  o  kaha  mga  nag-atubang  og bug-at  nga  balatian.

Kini  tungod  kay  ang  matag  tambalanan  makahimo na man  sa pagsagang  sa  panginahanglan  sa pasyente  pinaagi sa kaalerto  sa  mga  kawani  ug  mga mananambal  niini  gumikan  sa kaaktibo  sa  mga  pahibawo  pinaagi sa communication  network.

Matud  pa  ni Aquino  nga  nakab-ot  ang  maong  mga laraw  human  sa  mga pagtuon  nga gihimo  sa kagamhanan  gumikan  sa daghan  na  nga nasinatian  nga  mga panghitabo  nga  gumikan  sa kakuwang  sa  mga  kahimanan  sa  kagamhanan,  daghan  kaayong  kinabuhi  ang  dili  na  makaabot og  tambalanan  kay mabugto  na  sa sakyanan nga  nagbiyahe  pa  sa kadalanan. (WC) (BANAT NEWS)