Lawas sa ulitawo nalata na

CEBU, Philippines - Nalata  na nga  patay’ng  lawas  sa  usa  ka ulitawo nga nagbay-ad sa kalibunan nga bahin  sa barangay Bulyogan lungsod sa Dumanjug niadtong Lunes  sa hapon.

Ang biktima nga gituohang  niadto pang niaging semana gipatay ug gilabay sa maong lugar, mao si Jerome Abatayo, 21, ulitawo ug nagpuyo sa maong  dapit  apan nag trabaho isip construction worker dinhi sa dakbayan sa Sugbo.

Si PO3 Dionisio Tagopa sa Dumanjug Police Station mibutyag  sa Banat News  nga ang tanod nga si Julian Quirante, hingkod, maoy nakadiskobre sa patay’ng lawas sa biktima  dihang  mialisbo ang kabaho niini sa  kalibunan ug gi-report dayon  ngadto  sa ilang  buhatan.

Matud ni P03 Tagopa  nga dili na maklaro kun gi-unsa pagpatay ang biktima, gipusil  ba  o giluba  ba, tungod kay nalata na bisan ang nawong niini di  na gyud  maklaro.

Sa pakisusi sa kapolisan nahibaw-an nga katapusang nakit-an ang biktima nga mipauli  sa ilang balay kaniadtong Oktobre  24   nga nitambong og disco nianang   alas 8:00  sa  gabii atol sa pista  sa  ilang  lugar.

Gikan niadto wala na kini igkita ug padayong gipangita sa mga kabanay hangtud nga patay  na  kini   dihang napalgan.

Ang kapolisan padayon pa sa ilang pakisusi pagtino kun gipatay ba gyud ang biktima ug  kinsa  usab  ang  responsabli sa maong krimen. (BANAT NEWS)