Polis ‘pusher’ duol sa RTS

CEBU, Philippines - Sa dose ka mga gidudahang tigpayuhot og ilegal nga drugas diha sa barangay Gaas sa lungsod sa Balamban, usa kanila giingong sakop sa kapolisan.

Ang kapitan sa barangay Gaas nga si William Genel, mibutyag sa mga tigbalita nga adunay dose ka mga tawong ilang nasayran nga tigpayuhot ug tigamitan og ilegal nga drugas nga anaa ra sa palibot sa Regional Training School-7.

Matud pa sa kapitan usa sa iyang mga tanod ug usa sa mga sakop sa Lupon   Tagapamayapa ang miangkong nakagamit og ilegal nga drugas ug nakauban pa ang usa ka polis sa pagpanuyop.

Samtang dugang gibutyag ni Genel nga duna say usa ka mga trainee nga ilang nailhan nga tiggamitan usab og ilegal nga drugas ang ilahang gipatawag ug gikatahong miangkon kini   ug misaad nga dili na kini usbon pa. “Bati na kay mikatap naman sa duol sa RTS. Mao nga naalarma na mi, nangita gyud ko’g paagi nga masayran kun si kinsa ni sila hangtod nga nahibaw-an nako maong ako silang gipatawag,” matud pa ni Genel

Matud pa sa kapitan nga ang iyang tanod ug sakop sa lupon mibutyag nga ang maong polis mao pay mihagad kanila nga mosuyop.

Dugang pa ni Genel nga iyaha nang gipangayoan og tabang ang Philippine Drugs Enforcement Agency (PDEA) kabahin sa maong problema.

Apan ang hepe sa Allied Training Affairs Division, Chief Insp. Ramon Landingin mibutyag nga wala silay nasayrang sakop sa RTS nga nalambigit sa paggamit og ginadiling drugas.

Matud pa ni Landingin higpit sila sa ilang mga trainees ilabi na niadtong  nahatagan og passes nga makagawas sa training camp, higpit usab ang ilang pagsiksik sa mga tawong mosulod o mobisita sa ilang kampo.

Sa nasayran adunay 324 ka mga police trainees ang anaa sa RTS nga gipaabot nga mogradwar sa umaabot nga bulan sa Hulyo sunod tuig. (/EIM)(BANAT NEWS)