19 ka drayber drug users
CEBU, Philippines - Sa 90 ka mga drayber sa bus ug pampublikong jeep nga kalit gi-drug test kagahapon 19 kanila ang nagpositibo sa paggamit og ginadiling drugas.
Ang Land Transportation Office-7 milusad og roadside random drug test isip kabahin sa Oplan Ligtas Biyahi 2012 nunot sa umaabot nga kalagkalag.
Si Regional director Raul Aguilos, mipahibalo sa Banat News nga atol sa ilang gihimong random drug test, tulo ka mga drayber sa bus ang nagpositibo sa illegal nga drugas samtang 16 usab sa mga drayber sa jeepneys.
Gawas sa gipahigayong random drug test mihimo usab og roadworthiness test lecture ang LTO ngadto sa mga drayber diin sila gitudloan kalabot sa road safety measures sa kadalanan aron malikayan ang disgrasya.
Butyag usab ni Aguilos nga apil sa ilang gibantayan ang overloading sa mga pasaheroan tungod sa kadaghan sa mga pasahero.
Subli usab nga mipahimangno si Aguilos ngadto sa mga draybers nga magmatngon sa kadalanan ug kanunayong huna-hunaon ang kinabuhi sa ilang pasahero.
Adunay help desk nga ibutang ang LTO ug Land Transportation and Franchising Regulatory Board aron usab makatabang sa publiko kun aduna silay mga reklamo kalabot sa sakyanan ug sa mga draybers.( EIM) (BANAT NEWS)
- Latest
