Kandila miugdaw’g 4 ka balay

CEBU, Philippines - Naugdaw  ang  upat  ka  balay  dihang  ang  kandila  nga gigamit  sa pangadye natumba    nga nagsiga  sa  usa  sa  mga balay  nga naugdaw  didto  sa   Vista Villa Subdivision, barangay Basak, dakbayan sa Lapulapu sa miaging  Lunes sa hapon.

Ang nag-ugdaw nga   mga  balay  gipanag-iya ni Mario Alibangbang, Lilebeth Castro, Jegar Apiag, Riza Dalen ug duha ka balay nga gipanag-iya ni Paul Ignacio.

Si FO1 Rufflet Amores sa Bureau of Fire Protection (BFP) sa maong dakbayan nga nahinabi sa Banat News miingon nga ang kayo didto  magsugod sa ikaduhang andana sa balay  ni Alibangbang.

Dugang pa niya   nga dali kaayong mitapon ang kayo ngadto sa mga kasikbit nga balay  niini tungod sa gitapok nga mga karton   sa palibot  ilabi na nga  pulos bag-o  pang   nahuman  og pintal ang maong  mga balay nga nasunog.

Gibana-bana  sa  kabomberohan  nga  mokabat sa P250,000 ang gibiling kadaut sa maong sunog  nga nakontrolar sulod  sa 20 minutos.

Matud pa ni FO1 Amores nga  gipaubos dayon  nila sa 3rd alarm ang maong sunog busa  dali  rang  nasumpo  gumikan  sa kadaghang  mga  firetruck   gikan  sa nagkalainlaing  lugar  sa Metro  Cebu  ang  mitabang  kanila.

Si FO1 Amores miingon nga sa wala  pa  ang maong sunog nagtarok  og  mga kandila  nga dinagkotan  ang  pamilyang  Alibangbang  sa  ilang altar kay  nangadye  sila  sa mga  kalag alang  sa umaabot  nga  Kalag-Kalag  karong Nobiyembre 2.

Gumikan  kay maoy mandar  sa mananabtan  nga  di  lang ipapawong  ang  mga kandila  buwahan  may kahayag  ang  mga  kalag  nga  mobisita  sa balay sa  mga Alibangbang,  gibiyaan  sa  mananabtan  ug  sa sakop  sa panimalay  nga nagsiga  kini  sa ibabaw  sa altar.

Apan  samtang  nalingaw  ang  tanan  nga  nangaon  og snacks  sa  silong  human sa pangadye, gituohan  nga  may  misaka  nga mga kalag  nga  naghudyaka sa balay  sa mga Alibangbang ug  dihang  natandogan  ang  kandila, natumba nga  maoy  hinungdan  sa sunog.

Si FO3 Amores miingon nga  puwerting  kurata  sa tanan apan  tungod  kay dako na kaayo  ang kayo, wala  na nila  kini  matabang  kay dali  kaayong  mikaylap sa tibuok dapit   busa  mitawag  dayon  sila  og  bombero.

May  pangagpas  ang ubang  mga silingan  ug  mga tigpaniid  nga  malagmit  may  nasuko  nga kalag  sa balay  sa  mga Alibangbang hinungdan  nga gisunog  kini. (WC)  (BANAT NEWS)