Sound sa videokehan gikontrolar

CEBU, Philippines - Higpit nga gidili sa kagamhanan sa dakbayan sa Mandaue sa mga  videoke bar sa pagpatuyang og pakusog sa tingog sa ilang  mga sound system nga makatugaw sa katulogon  sa publiko sa  lawom na nga  oras  sa kagabhion.

Ang  maong pagdili  maoy  gibatbat  sa  usa ka  ordinansa  Numero 12-2011-663 nga  nagpitol  sa  mga tag-iya  og videokehan  nga   nawad-an  og  respeto  sa publiko.

Gidayeg  sa katawhan  ang  mga  konsehal sa Mandaue  nga nakaamgo  sa  kalagot  ug kapungot  nga  ilang  gihambin batok  sa mga  tag-iya  og videokehan  nga nawad-an  sa hustong  pamatasan.

Ang  pagpakusog  sa tingog  sa ilang  sound system  bisan  lawom na  nga  gabii  nakapaugtas  sa  ubang  mga senior citizen,  mga  masakiton, mga motrabaho  og  sayo  ug  ubang  mga  tawo  nga  di  gusto  og  lingogngog  panahon  sa kagabhion.

Hinuon si City Administrator James Abadia nga nahinabi sa mga tigbalita miingon nga ang maong  ordinansa  gitumong aron mapugngan  ang  mga  tag-iya sa  videokehan  gikan  sa  pagpatuyang  sa ilang  gusto  kinsa  sila ra  sa ilang kaugalingon  ang  nakauyon sa ilang  gibuhat.

Alang  sa  katawhan  di na  kinahanglang magpaabot  pa  ang mga  opisyal  sa dakbayan  og  reklamo  gikan kanila kay  sila mismong mga konsehal  sa ilang kaugalingon  makasaksi  niini  kun buot  nila  ug labaw  sa tanan  tawo  usab  sila  nga normal  nga di makauyon  sa lingogngog  ug  langas nga  palibot  panahon sa lawom nang kagabhion.

Matud pa ni Abadia  nga ang siyudad nagpadayon sa  pag- inspection sa mga videoke bar sa pagsiguro  nga gituman sa mga tagdumala niini ang gilatid sa ordinansa.

Dugang pa niya nga ang tingog sa mga videoke kinahanglan nga makontrol pinaagi sa gitaud nila nga sound reduction ug  visual display nga maoy  moduyog sa magkanta nga dili usab law-ay  tan-awon.

Sa maong ordinansa  gitugotan  ang  mga  videokehan  sa pagbukas gikan sa adlaw  nga Domingo ngadto sa Huwebes sa  alas 8:00 sa buntag hangtod sa alas 12:00 sa tungang gabii.

Sa Biyernes ug Sabado   gitugotan   sila  pagbukas gikan sa alas 8:00 sa buntag hangtod sa ala 1:00 sa kaadlawon  sa matag semana.

Ang makalapas sa maong ordinansa makabayad og P500 alang sa unang higayon, P1,000 sa ikaduha ug P2,000 alang sa ikatulo ug lakip na ang pagsakmit sa ilang videoke machine ug  pagpatak-op  sa ilang  videokehan.(Romeo  T.  Limpangog/WC) (BANAT