Nakuryentihan sa water pump tipi
CEBU, Philippines - Nagkulob na sa sapa ug wala nay kinabuhi dihang naabtan sa iyang kapuyo ang usa ka hollowblock maker nga gituohang nakuryentihan sa water pump nga iyang gigamit pagkuha og tubig nga gamiton sa iyang pagmasa sa semento.
Kini nahitabo sa sitio Candarong sa barangay Pulangbato sa siyudad sa Sugbo kagahapon sa buntag diin usa ka Celedonio Carbon, 47, ang nakuryentihan.
Sumala pa ni PO3 Leroy Baguio sa Homicide Section sa Cebu City Police Office sa pakighinabi sa Banat News nga padulong unta magpundo og tubig gikan sa sapa sa ubos nga bahin si Carbon.
Ang tubig gamiton niya’g masa sa semento ug balas nga himuong hollowblock ug gigamitan niya kini og portable electric pump apan nakuryentihan.
“Wala niya ma-off ang breaker, nalimtan siguro niya,” matud pang Baguio. Ang kapuyo ni Carbon nga si Jocelyn Billaceno pagkakita kang Carbon nga nahapla na sa sapa daling mipawong sa breaker ug nangayo og tabang.
Sumala pang Baguio kinahanglan untang wala maka-on ang pump sa pagtusmod niini diha sa sapa. (Edwin Ian Melecio) (BANAT NEWS)
- Latest
