LTO-TFA 12 ka tuig na

CEBU, Philippines - Ang LTO-Task Force Alpha (LTO-TFA) nagsaulog karon sa ika-12 na ka tuig nga boluntaryong pagserbisyo aron makatabang pag-edukar sa mga motorista diha sa kadalanan. 

Dinhi sa Sugbo, bugtong ang Task Force Alpha ra maoy Non Government Organization (NGO) nga gihatagan og pagtugot sa kadagkoan sa Land Transportation Office (LTO) nga motabang sa ilang regular enforcers nga makasakmit og lisensya sa mga drayber. 

Ang tumong sa paghulma sa Task Force Alpha napulo’g duha ka tuig na ang nakalabay mao ang pagpakita sa katawhan nga lahi ang maong grupo nga mopatuman og balaud nga naglambigit sa Republic Act 4136, kon Transportation and Traffic Code.

Ang TFA gilangkoban sa mga sakop nga gikan sa lainlaing sektor sa katilingban sama sa kapolisan, kawani sa lainlaing ahensya sa kagamhanan, mga negosyante ug mga propesyonal, apil na sa media, aron pagpakita nga marespetohan kadtong grupo nga dili mangilkil sa mga madakpan. Sa kapin sa 100 ka sakop sa TFA, kapin sa 60 kanila ang gi-deputize sa LTO pinaagi sa kamandoan ni LTO Chief Virginia Torres. Ang gidaghanon sa mga lisensya nga nasakmit sa LTO midaghan pinaagi sa pag-abag sa mga sakop sa TFA nga katulo sa usa ka semana mopahigayon og checkpoint operations sa lainlaing dapit dinhi sa dakbayan ug ubang bahin sa Metro Cebu.

Dili basta basta ang pagpasakop sa TFA tungod kay sutaon pag-ayo sa ilang mga opisyal nga ang gusto mosulod sa ilang kahugpongan kinahanglan nga duna silay maayo nga trabaho nga arang-arang og sweldo, o kaha negosyo sa tuyo nga di sila matintal sa kwarta.Ang kadagkoan ug mga sakop sa Task Force Alpha giawhag ni LTO-7 Regional Director Raul Aguilos nga padayong magbinuotan sa ilang pag-abag sa LTO aron madisiplina ang mga badlongong drayber. (BANAT)