CEBU, Philippines - Tungod sa padayong pagsiaw sa pagpangawat og mga sakyanan didto sa Manila nga anhi ipamaligya sa Kabisay-an ingon man ang pagpangawat og mga sakyanan ug motorsiklo dinhi sa nagkadaiyang grupo sa sindikato, ang kapolisan sa Provincial Highway Patrol Team (PHPT-CEBU) ug ang Deployment Management Traffic Unit Association Inc. (DMTUAI-Region 7) mipirma og memorandum of agreement aron maghiusa batok niini.
Ang PHPT-Cebu nga nagbase sa barangay Cansaga lungsod sa Consolacion nga gipanguluhan ni Chief Inspector Eduardo Napal Mara samtang ang DMTUAI-Region 7 nga tua usab magbase sa barangay Yati lungsod sa Liloan gipangulohan usab kini sa ilang chairman nga si Hernando Gastador.
Ang PNP midasig nang daan sa HPG sa pakigtambayayong sa mga civic organizations o non-governmental organization aron mapakgang ang susamang krimen.
Ang PHPT-Cebu ug DMTUAI -7 nagkasabot nga magtinabangay sa seguridad sa mga motorista ilabi na kung dunay mga dagkong kalihokan sa Sugbo susama na lang ang Oplan Sumvac, Oplan Kaluluwa, Balik Eskwela ug uban pa.
Ang DMTUAI magsilbing ‘force multiplier’ sa kapolisan ug miawhag sa katilingban nga suportahan ang mga programa sa kapolisan kontra krimen ilabi na ang carnapping, high jacking ug highway robbery o hold-up sa rehiyon.
“Whereas, no less than the leadership of Philippine National Police has strongly encourage the HPG to enlist Civic Oriented Organizations, Non Government Organizations and other sector in the society to support the PHPT-Cebu in its campaign to reduce if not totally eradicate the occurrence of carnapping, hijacking and highway robbery/hold-up in the region,” tipik sa MOA sa duha ka grupo.
Apil unya sa mamahimong papel sa mga volunteers sa DMATUAI mao ang pagtabang sa pagpatunhay sa trapiko. (BANAT)