Tulisan nag-atang sa biktima diha sa balay

CEBU, Philippines - Linibo ka pesos, dolyares ug mahalong cellphone ang nasakiyo sa nagbinugtong nga tulisan nga diha na sa sulod sa pinuy-anan sa usa ka kawani sa bangko sa Villa Amores Poblacion Ward-4 sa lungsod sa Minglanilla niadtong Biyernes sa alas 8:30 sa gabii.

Ang biktima mao si Maria Expedita Sabellon, 53, nagpuyo sa maong lugar samtang usa ka wala mailhing lalaki nga nakasulod sa balay niini nga armado og pusil ang mitulis kaniya.

Matod ni PO2 Vincent Alinabo sa Minglanilla Police Station dihang nahinabi sa Banat News nga mao pay pag-abot sa biktima gikan sa trabaho ug mipasiga sa suga sa kusina. Nakugang na lang kini nga may tawong mition kaniya og armas ug miingon: “ayaw og saba ambi na ang imong bag,” ug pagkahuman daling migawas agi sa pultahan sa kusina.

Nakuha sa suspek ang bag nga dunay sulod nga kwartang moabot og P17 mil, 100 ka dolyar, laing 1 dollar bill, duha ka cellphone ug personal niyang gamit. Ang kapolisan padayon pang nag-imbestigar sa hitabo (EIM) (BANAT)