P100 mil balor nga mga parte sa inidoro gikawat

CEBU, Philippines - Nagkadaiyang bahin sa inodoro sa kasilyas nga mokantidad sa P105,000 ang giingong gikawat sa wala pa mailhing tawo diha sa sulod sa buhatan sa BSP Camp sa Barangay Cansomoroy, Balamban niadtong Huwebes sa hapon. Gidudahang dugay nang gihinayhinayan sa pagkawat ang unom ka toilet flush bulbs ug siyam ka urinal flush bulbs apan niadtong Huwebes lang namatikdan ni Engr. Rodelio Cuorisca sa pag-inventory niini.

Base sa pagsusi sa kapulisan nga walay force entry nga nakita sa maong edipisyo hinungdang nagduda silang posibleng inside job ang nahitabo.

Samtang gibanabanang mokantidad sa P100,000 nga nagkalainlaing alahas ang nasakiyo sa duha ka lalaki ug duha ka babayeng tulisang nag-awto gikan kang Vergilia Quer, 59, samtang kini nagpaabot og masakyan sa barangay Catmondaan, Catmon Huwebes sa buntag.

Giingong hihunungan ang biktima ug gitionan og armas dayong kuha sa iyang mga alahas. (BANAT NEWS)