Mga gambling machines gipangsakmit

CEBU, Philippines - Dul-an 20 ka mga video games machine ang nasakmit sa hiniusang pwersa sa kapolisan sa City Intelligence Branch ug Investigation and Detective Management Branch sa Cebu City Police Office kagahapong adlawa sa ilang gihingusgang kampanya batok sa illegal numbers game.

Ang nasakmit mao ang lima ka video carera, duha ka mole-mole, ug napulo ka pinball gikan sa Quiot-Pardo, Bato Carbon ug Duljo-Fatima sa dakbayan sa Sugbo.

Ang hepe sa CIB nga si Chief Insp. Romeo Santander mibutyag nga daghang mga concerned citizen nga nagpakabana ang misumbong kanila bahin sa maong mga sugalan.

Sumala pang Santander adlaw-adlawon nila ang operasyon batok sa illegal number games ug sa mga sugarol.

Matod pa ni Santander nga ang ilang relasyon ngadto sa mga barangay officials mas milig-on pa tungod sa kooperasyon sa maong operasyon. (BANAT NEWS)