Flower Festival gilusad

CEBU, Philippines - Aron mouswag ug molahutay ang industriya sa buwak, ang kagamhanan sa syudad sa Sugbo mibukas sa tulo ka adlaw nga Flower Festival Celebration sa may Plaza Sugbo atubangan sa Cebu City Hall kagahapon.

Si Apple H. Layon, hepe sa Cebu City Agriculture Department mibutyag sa Banat News nga ang pagbukas sa ika-upat na ka tuig nga kasaulogan sa Flower Festival gihimo pinaagi sa usa ka pasunding nga gisalmotan sa 11 ka mga float nga pulos puno sa mga dayan-dayan sa nagkalainlaing mga piniling mga buwak nga nanukad sa Fuente Osmeña hangtod sa tugkaran sa Cebu City Hall.

Matud pa ni Layon nga ang 11 ka mga float nag-representar sa 11 ka barangay nga misalmot sa selebrasyon karong tuiga nga mao ang Pung-ol Sibugay, Sirao, Sudlon II, Guba, Taptap, Adlaon, Bonbon, Malubog, Babag, Buot-Taop ug Budlaan.

Miingon si Layon nga dinhi sa dakbayan sa Sugbo may 14 ka mga bukirang barangay ang nanginabuhi ubos sa cut-flower industry kun pananom og buwak apan ang Pamutan, Toong, ug Sapangdaku, wala lang una mosalmot kay naniid pa sila bahin sa sistema sa kompetisyon nga nagpadasig sa maong kasaulogan. Gitug-an ni Layon nga adunay upat ka mga pasundayag nga basehan sa kompetisyon alang sa paghimong alegre sa kasaulogan sa Flower Festival karong tuiga, nga may tema nga “Enhancing Competitiveness of Cutflower Associations for Sustainable Quality Productions”.

Kini mao ang Float, Open Booth Display, Flower Arrangement, ug usab Dance Competition. Matud ni Layon nga ang dance competition karon lang tuiga nila ipatuman lahi sa nanglabay nga tulo ka tuig sukad ilusad ang Flower Festival niadtong 2009 nga mao ra ang float, open booth display ug flower arrangement nga competition mao ray giduyog sa selebrasyon.

Ang mga mananaog sa nahisgutang mga bangga makadawat og P30,000 alang sa mananaog sa unang ganti alang sa float competition; P20,000 sa 1st prize winner sa Open Booth Display, P4,000 alang sa mogawas nga 1st prize winner sa individual flower arrangement ug P20,000 ang ganti sa mamahimong 1st prize winner sa dance competition.

Miingon usab si Layon nga gipadasig gayud sa kagamhanan ang mga mag-uuma nga nanginabuhi ubos sa industriya sa buwak tungod kay nakita niini ang potensyal niining maong industriya sa paghatag og dugang kauswagan sa ekonomiya sa dakbayan.

Si Mayor Michael Rama kanunay nga mipaila sa mga pamilya nga nanginabuhi sa kabulakan tungod kay nakita niini ang kauswagan sa ilang pagpuyo, nakapalampos sa pagtungha sa ilang mga anak, nakapamalit og mga yuta, nakapatukod og mga maayong balay, nakapalit og mga sakyanan ug sa laktud miasenso sila niining maong matang sa panguma.

Sumala ni Layon nga ang Sugbo maoy giilang komprahanan og buwak sa taga Manila, Iloilo ug uban pang lalawigan sa nasud   sa mga buwan sa Nobiyembre, Disyembre, Pebrero ug Mayo. Ang kagamhanan mipadasig sa mga mag-uuma sa kabukiran sa pagsagop sa panguma og kabulakan uban sa pasalig niini nga mohatag og libreng seminar ngadto sa mga interesado.

Midugang si Layon nga kining tulo ka adlaw nga Flower Festival gisuportahan usab sa rehiyonal nga buhatan sa Department of Agriculture. (BANAT NEWS)