Eskuylahan sa Jaclupan namingaw

CEBU, Philippines - Human sa kaguliyang niadtong adlaw’ng Lunes ug Martes didto sa Jaclupan National High School sa dakbayan sa Talisay kay may mga tinun-an nga nasudlan og dautang espiritu, kagahapon mingaw na kaayo ang maong eskuylahan ug dyutay ra kaayo ang mitambong sa klase.

Apan si Ann Sanchez, usa ka inahan sa grade-seven nga estudyanteng babaye sa maong tunghaan nagkanayon nga wala siya batia og kahadlok gumikan sa dako niyang pagsalig sa Ginoo.

Gibutyag ni Sanchez nga niadtong Lunes ang iyang anak giapas niya sa tunghaan tungod kay miapil kini sa pagkupot-kupot sa unang estudyante nga giingong nasudlan og dautang espiritu.

Matud niya nga ang ubang mga estudyante nga mikupot – kupot sa nasudlan sa dautang espiritu natakdan kay didto na usab mibalhin kanila ang maong demonyo, apan ang iyang anak wala matakdi.

Kagahapon si   Sanchez nagkanayon nga wala niya paadtoa sa eskuylahan ang iyang anak kay namauli man ang mga kauban niini kay way tarong nga klase.

Kini tungod kay kagahapon sa kaadlawon, si Julieta Ragasta, usa sa mga magtutudlo sa maong tulunghaan gidudahang nasudlan usab og demonyo kay gibati kini og kaluya ug kakapoy sa lawas busa gidala kini ngadto sa Mary’s Little Children sa Tabunok.

Ang prinsipal sa maong eskuylahan nga si Maria Imelda Valde mibisita kagahapon sa mga balay sa mga estudyante nga nabiktima sa dautang espiritu ug gidapit nga mamalik na sa ilang klase.

Ang principal nagkanayon nga dili angayang mahadlok ang mga estudyante ug mga ginikanan tungod kay nabendisyonan na ni Msgr. Frederick Kriekenbeek ang tunghaan ug iyang gipaniguro nga mahadlok na ang mga dautang espiritu.

Sa laing bahin, si Felipa Solana, hepe sa city social welfare sa Talisay nakigkita kang Valde ug mipasabot siya sa iyang tinguha nga andam siyang mohatag og ayuda pinaagi sa pagpaubos sa mga estudyanteng nasudlan sa dautang espiritu sa stress debriefing.          Ang city social welfare office sa Talisay adunay mga stress debriefer ug nakig-alayon usab kini sa ilang rehiyonal nga buhatan kalabot sa ilang angay buhaton.

Sa laing bahin usab, si Konsehal Celiapo Cabuenas, chairman sa committee on social services kinsa misusi kagahapon ngadto sa tunghaan nagkanayon nga ipadala nila ngadto sa maong tulunghaan ang city health officer nga si Dr. Lino Alanzano aron mapaubos sa check up ang panglawas sa mga bata kay basin og nagkinahanglan kini og tabang bahin sa medisina ug sa ilang psychological problem.

Matud ni Cabuenas nga adunay ubang mga grupo usa na niini ang kapitan sa barangay Basak, dakbayan sa Sugbo nga si Dave Tumulak ang mitanyag og tabang nga mopadala usab og doktor ngadto sa Jaclupan. (BANAT NEWS)