CEBU, Philippines - Nababha ang nawong sa 45 anyos nga lalaki dihang giluthang kini sa wala hiilhing tawo nga iyang gikaestorya sa gawas sa iyang balay didto sa barangay Tindog sa lungsod sa Medillen niadtong Martes sa alas 8:00 sa gabii.
Ang biktima mao si Emaquito Conde, 45, minyo, ug molupyo sa maong lugar.
Si PO2 Roselito Ortega sa Medillen Police Station mibutyag sa Banat News nga nakit-an sa asawa sa biktima nga may tawo kini nga gika-estorya sa wala pa kini pusila sa gawas sa ilang gate. Apan paglabay sa pipila ka gutlo mao na lay nabati nila ang lanog nga buto sa armas de fuego ug sa ilang pagsusi nahagba na sa yuta ang biktima nga naglunang sa dugo niini.
Diha-diha mibiya usab dayon ang kriminal, samtang ang biktima gihatud ngadto sa Verallo District Hospital sa siyudad sa Bogo diin didto kini ideklarar nga patay na sa paghiabot.
Si PO2 Ortega nagkanayon nga gitutokan nila karon ang anggulo bahin sa bangi sa biktima ug sa uban pang manunod sa yuta nga kabilin sa ilang ginikanan.
Padayon pang gipangita sa kapolisan ang kriminal. (/WC)(BANAT NEWS)