Nagpalit og itlog gipusil patay

CEBU, Philippines - Namatay ang usa ka 60 anyos nga lalaki dihang gipusil kini sa usa ka tawong nagsakay og motorsiklo didto sa national highway sa Poblacion Oriental, lungsod sa Consolacion kagahapon pasado alas 5:00 sa kabuntagon.

Ang biktima mao si Marcelo Aguilar Lato, minyo, nga lumad nga taga dakbayan sa Danao apan mibalhin na og puyo sa Consolacion. Si PO1 Adrian Balanay sa kapolisan sa maong lungsod nga nahinabi sa Banat News miingon nga nagpalit lang og itlog sa usa ka tindahan sa maong dapit ang biktima ug gihunongan kini og motorsiklo nga giluwanan sa nagbinugtong nga lalaki unya maoy miluthang niini.

Human   mahagba sa yuta ang biktima mipabulhot sa iyang motorsiklo ang kriminal paingon sa lungsod sa Liloan

 Ang biktima kinsa samaron sa iyang aping ug walang dunggan dali untang gihatod ngadto sa Eversely Child Sanitarium Hospital sa Jagobiao, dakbayan sa Mandaue apan gideklarar kini sa mga doktor nga dead on arrival.

Matud pa ni PO1 Balanay nga si Dolores Lato nga asawa sa namatay    mitug-an kanila nga ang biktima motambong unta sa hearing sa yuta sa korte sa dakbayan sa Danao ala 1:00 ang takna sa hapon sa maong adlaw.

Dugang pa niya nga naglambigit ang maong kaso sa yuta nga gipalit sa namatay apan may kaso nga anaa sa korte.

Si PO1 Balanay miingon nga gisubay nila karon ang maong anggulo samtang padayon nilang gipangita ang killer. (BANAT NEWS)