Bala miigo sa aping lapos tingkoy

CEBU, Philippines - Nalungag ang ulo sa wala hiilhing tawo kansang lawas napuno sa patik nga nagbuy-od sa daplin sa dalan ug gituohang gi-salvage didto sa Sitio Rekyo, barangay Inayagan siyudad sa Naga kagahapon sa alas 4:00 sa kaadlawon.

Ang biktima gihulagway sa kapolisan nga tabunon og pamanit nga gibana-banang may gitas-on nga 5’5, nagsul-ob og tsinelas nga gray, blue nga sleeveless ang senina ug karsones maong, samtang naputos sa   patik nga buwak sa rose ang tuong kamot niini.

Samtang ang tangkugo niini may markang “Tulits”, laing patik sa dughan nga “Elias and Lady May”, laing patik sa tunga-tunga sa bat-ang nakasuwat ang “LUM 35”.  Ang kapolisan nga miresponde ug misil-ing sa patay’ng lawas sa biktima nakapunit og duha ka lighter nga gikuptan sa biktima, usa ka blade, basiyo sa aluminum nga putos sa gatas, kaha sa sigarilyo ug dunay usa ka kabhang sa kalibre .45 nga bala didto sa crime scene nga gituohang gikan sa armas sa wala hiilhing kriminal nga mipatay sa biktima.

Si PO1 Nilo Dacles sa Naga City Police Station mibutyag sa Banat News nga ang biktima nakit-an pa nga naglakaw sa dalan paingon sa habagatang bahin dihang milanog ang buto sa armas.

Pagkahuman nakit-an na lang sa mga molupyo nga nahagba na kini sa yuta kansang tuong aping nabuslot sa bala nga nilapos sa luyong bahin sa iyang ulo.

Gisuwayan pa unta kini og hatud ngadto sa Minglanilla District hospital apan gideklarar kini nga Dead On Arrival (DOA) didto.

Ang kapolisan padayon pa sa imbistigasyon pag-ila sa kriminal ug ang motibo sa maong krimen

Gipanid-an usab sa palibot sa Naga ang giingong adunay grupo sa wala hiilhing mga tawo kansang misyon mao ang pagpatay o pag-salvage sa mga drug addict, tulisan, mga drug dealer ug uban pang mga tawong dautan sa maong lugar.

Kasamtangang gihaya ang biktima sa usa ka punerarya sa Naga samtang nagpaabot sa mga tagtungod nga mokuha niini. (/WC)(BANAT NEWS)