Imbistigasyon sa mga magtutudlo sa CIS gi-oktaba

CEBU, Philippines - Ang pagpahigayon og preliminary investigation (PI) bahin sa kiha nga homicide due to reckless imprudence nga giduso ni Jacqueline Gullas- Weckman inahan ni Kyle Weckman , (ang usa sa duha mga estudyanteng nakalas sa disgrasya didto sa Bataan atol sa ilang field trip), batok sa mga magtutudlo sa Cebu International School (CIS), giuswag   sa laing petsa human ang abogado sa pikas habig nangayo og dugang lugway sa paghandos sa ilang counter affidavit.

Si manlalaban Celso Espinosa, usa sa mga abogado sa pamilyang Weckman nagkanayon nga ang maong PI gitakda untang ipahigayon niadtong Oktubre 8, 2012 sa alas 2:00 sa hapon sa buhatan ni Prosecution Attorney Gail Stephanie C. Maderazo.

Apan si manlalaban Edmund Villanueva, abogado sa usa sa mga gireklamo nga si Diedre Fisher, Superintendent sa CIS ug si manlalaban Estrella C. Elamparo abogado sa mga magtutudlong gireklamo nga sila si Tyler Herbst, Susan Rigby, Socorro La Plana, Leah Cabanban ug Geronimo Alcura mihangyo ngadto sa korte nga hatagan sila og dugang 20 ka adlaw nga lugway sa pagsumiter sa ilang counter affidavit.

Ang nahisgutang mga magtutudlo maoy kauban sa mga bata sa ilang school field trip dihang nahitabo ang trahedya nga misangpot sa kamatayon ni Kyle ug sa iyang classmate nga si James Jung niadtong Septiyembre 12, 2012 didto sa Morong, Bataan.

Sila si manlalaban Espinosa ug   manlalaban Sylvia Almase Suarez, mga abogado sa pamilyang Weckman nagkanayon nga ang lagda sa korte nangayo kanila sa pagduso sa ilang counter affidavit sulod sa napulo ka adlaw. Apan ang Prosecution Attorney mihatag og direktiba sa mga gireklamo sa pagtunol sa nahisgutang counter affidavit karong Oktubre 22, 2012, samtang ang kihante kinahanglang makahandos sa iyang tubag sa umaabot nga Oktubre 31, 2012. (WC) (BANAT NEWS)