Napasok sa de karga patay

CEBU, Philippines - Namatay   ang usa ka ulitawo human kini mapasok   sa ilawom sa trak de karga didto sa highway sa barangay Pitalo, lungsod sa San Fernando kagahapon sa alas 4:30 sa kaadlawon. Ang biktima mao si Nino Rickiron Caballero, 25, ulitawo, nga taga sitio Kalubihan, barangay North Poblacion, lungsod sa San Fernando.

Samtang ang drayber sa de karga mao si Richard Adrian Canete, 27, ulitawo, nga taga lungsod sa Barili.

Si PO1 Cleofas Cabrera sa San Fernando Police Station mibutyag sa Banat News nga ang trak de karga kargado sa mga butong paingon sa siyudad sa Mandaue apan pag-abot sa maong lugar nabuthan kini sa ligid hinungdan nga giparking kini sa driver   sa daplin sa karsada.

Apan ang biktima   kinsa nagsakay sa iyang Yamaha Meo nga motorsiklo paingon usab sa siyudad sa Naga nga susamang dereksiyon, malagmit wa kaayo maka-klaro sa giparking nga sakyanan hinungdan nga napasok kini sa ilawom sa luyong bahin sa sakyanan ug didto maayong pagkaparok sa agtang sa biktima sa lawas sa de karga nga misangpot sa pagkawagtang sa iyang panimuot.

Gihatud dayon kini sa mga nakasaksi ngadto sa Minglanilla District Hospital sa lungsod sa Minglanilla, diin didto kini ideklarar nga patay na    samtang ang drayber sa de karga mitahan dayon sa iyang kaugalingon ngadto sa mga kapolisan sa San Fernando diin siya imbistigaha. (WC) (BANAT NEWS)