Gikan sa orphanage gi-salvage

CEBU, Philippines - Usa ka batan-ong gikan sa orphanage ang napalgang patay ug gituohang gi-salvage sa duha ka lalaking nagmotorsiklo pasado alas-5 sa kaadlawon sa kabukirang bahin sa barangay Toong dakbayan sa Sugbo. Ang biktima nailhan sa ngalang Jerry Boy Mansalay, 18, lumad nga taga Sipalay, Negros ug kasamtangang nagpuyo sa boarding house sa iyang magulang sa barangay Pardo sa siyudad sa Sugbo.

Sa pakighinabi sa hepe sa kapolisan sa Homicide Section sa Cebu City Police Office, Chief Insp. Sarah Jean Recla mibutyag nga base sa ilang nakuhang impormasyon nga ang biktima gikuha diha sa boarding sa magulang sa duha ka lalaking nagmotor.

 Buto na lang sa armas maoy nadungog sa mga molupyo sa nahitaboan nianang pagkakaadlawom ug dihang gisusi sa mga tawo nakit-an nilang nagbuy-od ang biktima nga naglunang sa kaugalingong dugo.

Matud pa ni Recla dunay samad pinusilan sa ulo nga maoy posibling hinungdan sa hinanaling kamatayon sa biktima.

Base sa nadawat nga impormasyon ni Recla ang biktima diha na magdako sa SOS Children Orphanage sa Talamban dihang gihatud kini sa apohan gikan sa Sipalay dihang nag-edad pa kini og 3-anyos uban sa iyang duha pa ka igsuon. Giingong walay ikagasto ang apohan niini pagpadako sa tulo ka mga apo sanglit nailo naman sila sa mga ginikanan maong gihatod sila sa maong orphanage.

“Mihawa siya last June this year lang kay gusto kuno niyang mahibaw-an ang iyang pagkatawo,” matod pa ni Recla.

Gawas niini, ang biktima giingong kasamtangang nagtrabaho sa usa ka restaurant nga ginganlan og Urban Kamalig.

Nasayran usab nga ang biktima nagkuha sa kursong nursing apan giingong naundang kini ug gani mikuha usab og kursong culinary arts.(EIM) (BANAT NEWS)