14 Bata, Inahan nayawaan

CEBU, Philippines - Subling nagkaguliyang kagahapon sa buntag ang Jaclupan National High School sa dakbayan sa Talisay dihang dunay laing mga tinun-an na usab ang giingong nasudlan og dautang espiritu.

Kagahapon mikabat ngadto sa 14 ang giingong na-possess lakip na niini ang usa ka inahan kinsa mikuha unta sa iyang anak diha sa tunghaan dihang nagkaguliyang na.

Ang ulahing na-possess pasado alas 12:00 sa udto kagahapon mao ang babayeng tinun-an sa 3rd year kinsa midagan pasaka sa eskuylahan tungatunga sa pag-ampo human sa Santos nga Misa.

 Apan igo ra kining naabot sa gate ug nagpunay na kini og siyagit hinungdan nga gitabang sa mga tinun-an ug ubang mga ginikanan ug gidala ngadto sa usa ka classroom ug gihinginlan ni Msgr.Frederick Kriekenbeek ang “misulod” nga dautang espiritu sa iyang lawas. Si Msgr. Kriekenbeek maoy official exorcist sa Archdiocese of Cebu.

Kahinumduman nga niadtong Lunes sa buntag 17 ka mga tinun-an sa maong tunghaan ang giingong na-possess ug gidala ngadto sa chapel sa Mary’s Little Children sa barangay Tabunok nga gidumala ni Msgr. Kriekenbeek.

Ang nahisgutang inahan mao si Leny Nebria, mibutyag sa mga tigbalita nga pagsulod niya diha sa tunghaan aron kuhaon unta ang iyang anak kalit lang siyang nakabatyag og kabugnaw ug dayon nalup-og na siya. Si Nebria gikuha sa iyang maguwang ug gibuboan og lana ang ulo diin giingong nakabatyag kini og init ug naulian. Ang ubang na-possess kagahapon gidala diha sa ilang simbahan sa duol diin dunay gipahigayong pag-rosaryo apan ang kadtong medyo grabe gidala ngadto sa Mary’s Little Children.

Ang prinsipal sa nahisgutang tunghaan nga si Maria Imelda Valde mibutyag nga ang insidente kagahapon nahitabo mga alas 9:00 sa buntag samtang nagpahigayon sila og pag-rosaryo human sa ilang flag ceremony.

Kagahapon suspendido na usab ang klase sa maong tunghaan sama sa nahitabo niadtong Lunes. Si Valde midugang magbuhat siya og report kabahin sa nahitabo kagahapon ug isumitir ngadto sa ilang division office. Ang maong tunghaan nahimutang kini sa ibabaw’ng bahin ug bungtod diin gipalibutan sa mga kahoy ug mingaw.

Dunay mga estudyante nga nahinabi sa mga tigbalita nga ang unang insidente nga nahitabo niadtong Septiyembre 21, 2012 padung sa ilang intramurals diin usa ka tinun-ang babaye sa 4th year ang na-possess ug mibutyag kini nga duna siya’y nakitang mga tawo nga pulos itom nga may kaubang bata, giingong mas daghan pa sila itandi sa mga tinun-an.

Gibutyag usab nga sa wala pa ang intramurals dunay grupo sa mga estudyante ang nagpahigayon og “spirit of the paper” diha sa maong tunghaan, kini giingong mao ang pagtawag sa mga espiritu nga gihimong kalingawan sa mga batan-on.

Si Melinda Honor, guidance councilor sa tunghaan mibutyag nga 19 ka tuig na siyang nagtudlo diha sa Jaclupan National High School ug kasagaran mauli siya mga alas 7:00 sa gabii usahay mga alas 8:00 tungod kay duna pa siya’y mga buhaton diha sa opisina.

Matud niya nga matag buntag mga alas 6:00-7:00 duna siya’y mabantayan nga mopanso sa ilang faculty room apan wala siya’y nakita, ini og tingpauli na sa gabii mo-punch out usab ang maong wala niya makit-ang mga tawo.

Gipasabot ni Msgr. Kriekenbeek kinahanglan ang motabang sa mga nasudlan og dautang espiritu kadto rang mga nakakumpisal kay mosamot og gara ang dautan.

Ang Department of Education gikatakdang mohimo og aksyon bahin sa maong hitabo samtang ang Department of Health mipasidaan nga kinahanglang sigurohon ang kaluwasan sa mga bata sa paglimbag-limbag nila atol sa hitabo. (EIM)  (BANAT NEWS)