Horror Booth buksan sa Mandaue

CEBU, Philippines - Ang Horror Booth sa Mandaue 2012 subli na usab nga masaksihan sa publiko sugod sa Oktobre 29 hangtod Nobiyembre 4 niining tuiga.

 Ang maong kalingawan nga anaa na sa iyang ikaunom nga tuig nga pasundayag sa maong dakbayan kanunay nga ipahaum sa kasaulogan sa All Saints Day ug All Souls Day sa matag tuig sa Nobiyembre 1 ug 2. Ang unang ginang nga si Mrs. Sarah W. Cortes nga maoy chairperson sa Committee for the Protection of Children sa dakbayan mibutyag atol sa press conference kagahapon nga kining maong kalingawan gitumong aron makahipos og salapi ang kagamhanan sa Mandaue aron makapanghatag kini og pinaskohan sa mga kabus nga kabataan unya sa pasko.

 Matud pa niya nga ang 48 ka ungo-ungo sa maong Horror Booth, pulos molupyo sa Mandaue kansang tahas mao ang paghadlok sa mga tawo nga mosulod sa horror booth.

Midugang ang unang ginang sa Mandaue nga tungod sa kadako og wanang sa Mandaue City Sports and Cultural Complex diin ipahigayon ang Horror Booth, gituohan nga malingaw gayud ang tanang mosaksi niini. Gitataw niya nga sama gihapon sa nangaging katuigan tag P20 ra gihapon ang tiket niini kutob sa mosaksi sa maong kalingawan.

Sama sa nangaging mga tuig, ang Horror Booth langkoban usab sa mga zombie, dracula, patay’ng tawo nga nabuhi, ug uban pa.

Si Cortes miingon nga mokabat sa 1,000 ka mga bata sa dakbayan maoy gitakda nga   makapahimulos sa kitaon niiining maong proyekto nga may tema nga “Kahadlok Mo, Pinaskohan Ko.”

Sumala niya nga niadtong miaging tuig nakahipos sila og kapin sa P162,000 nga maoy ilang gigasto sa Christmas Party sa mikabat og 600 ka kabus nga mga bata gikan sa 27 ka barangay sa siyudad.

 Matud pa niya nga ilang paningkamutan nga madoble pa ang ilang kitaon niini karong tuiga. (WC) (BANAT NEWS)