Gipusil'g unay sa ig-agaw kritikal

CEBU, Philippines - Kritikal ang kahimtang sa usa ka 55 anyos nga lalaki human kini unaya og pusil sa iyang ig-agaw didto sa Sitio Panukdokan, Barangay Cawayan sa lungsod sa Dalaguete niadtong Lunes sa hapon.

Ang biktima mao si Abelardo Dicdican, 55, minyo, nga   nagpuyo sa maong lugar, samtang ang suspek mao   usab si Antonio Dicdican,56 , ulitawo, nga iyang silingan ug ig-agaw.

Si SPO1 Veronico Centino sa Dalaguete Police Station mibutyag sa Banat News nga ang biktima nagbarug -barog atubangan sa pinuy-anan ni Remegio Saniel, ang suspek nga gihulagway nga hubog miduol sa biktima.

Dayon milanit kini sa iyang armas de fuego ug giluthang ang biktima sa pasangil nga nanghilabot kini sa iyang motor.

Ang biktima nga naigo sa dughan nahagba dayon sa yuta, samtang ang suspek mikabad usab dayon og dagan pahilayo sa maong lugar. Gihatod dayon sa mga tagtungod ang biktima ngadto sa Julio Cardinal Rosales sa lungsod apan gi-transfer kini sa tambalanan sa dakbayan sa Sugbo.

Ang suspek   nadakpan   usab dayon sa kapolisan atol sa hot pursuit operation   nga gilusad niini ug karon nagtingkagol na sa karsel samtang gihikay pa ang tukmang sumbong nga ipasaka batok kaniya.( WC)  (BANAT NEWS)