Kagawad gipusil angol sa ka hiilhing kriminal

CEBU, Philippines - Gipusil angol ang usa ka kagawad sa barangay sa wala hiilhing kriminal samtang naglakaw kini sa ngitngit nga lugar paingon na untang mopauli sa ilang balay didto sa bukirang bahin sa Sityo Biasong , barangay Agsuwaw sa lungsod sa Catmon sa miaging   gabii. Ang biktima mao si Locepino Colonia, 33 , minyo, ug barangay councilor sa maong lugar.

Si PO3 Ben Navales sa Catmon Police Station mibutyag sa Banat News   nga ang biktima naglakaw   sa dalan nga ngitngit kaayo paingon sa ilang balay migamit na lang sa iyang lighter isip iwag dihang pag-abot sa maong lugar nakabati kini og buto sa armas.

Unya pipila ka gutlo ang milabay nasuta niini nga namanhud ang iyang lawas ug   may miagas nga dugo ug nasuta niya nga naigo siya sa bala. Apan bisan og samaron, nakahigayon gihapon   siya sa pagdagan paingon sa labing duol nga balay   diin siya nakapangayo og tabang .

Daling gihatud ang biktima   ngadto sa Juan Dosado Memorial Hospital sa lungsod sa Sogod apan gi-transfer dayun sa tambalanan sa dakbayan sa Sugbo . Samtang ang kapolisan padayon pa sa   pag-imbistigar sa maong hitabo apan gumikan sa pagkakuwang og saksi naglisud pa sila sa pagtumbok sa kriminal.

Ang biktima giingong walay kontra sa ilang lugar.(Darrel A. Carumba/WC) (BANAT NEWS)