Jun Pe ipa-disqualify sa Team Rama

CEBU, Philippines - Gibutyag ni Mayor Michael Rama nga mobuhat ang iyang grupo og lakang batok kang Konsehal Augustus Pe kinsa padulong matapos ang iyang termino sa north district apan midagan na usab pagka-konsehal sa south district.

Buot ni Rama nga ipa-disqualify si Pe gumikan kay naka-serve na kini og siyam ka tuig nga pagkakonsehal sa north district sa siyudad sa Sugbo ug midagan pag-usab sa pagkakonsehal alang sa 2013 elections apan sa south district na pud.

Matud pa sa mayor nga iyaha na karon nga gipa-proseso sa iyang mga abogado ang maong lakang.

Nasayran nga nibalhin si Pe sa iyang rehistrasyon sa Sitio Banawa sa barangay Guadalupe niining dakbayan sa Sugbo nga nahimutang sa south district.

Apan gipadayag ni Pe nga pasagdan na lang unta ang katawhan nga mohukom kung pilion pa ba siya sa umaabot nga eleksyon.

Dugang pa niya nga nasayod ang katawhan sa iyang performance pagka-konsehal sa dakbayan busa mao kini ang mohukom kaniya.

Midagan karon si Pe pagka-konsehal sa south district ubos sa Bando Osmeña Pundo Kauswagan.

Samtang ang pangulo sa BOPK nga si Kongresista Tomas Osmeña misaysay nga ‘nasuya’ lang ang Team Rama hinungdan nga buot niini nga ma-disqualify ang kandidatora ni Pe. Ang Regional Director sa Commission on Election (Comelec-7) nga si Atty. Timmy Lambino nga nahinabi sa dyLA Radio misaysay nga kung madawat na nila ang petisyon sa Team Rama batok kang Pe, ilaha dayon kining ipadala sa Comele en banc sa kaulohan sanglit mao kini ang mopakanaug og hukom.

Nasayran nga mahimo na og pasakaan og petisyon ang mga politiko lima ka adlaw human sa katapusang adlaw sa pagduso sa certificate of candidacy (COC).