Kapitan nga nanghagit nangayo'g pasaylo

CEBU, Philippines - Nangayo og pasaylo si Kapitan Antonino “Tony” Maquilan sa barangay Mantuyong, dakbayan sa Mandaue sa iyang pagpanghasi sa demolition team nga miguba sa iyang mga tangkal sa baboy sa karaang ihawan, sa maong dakbayan.

Pinaagi sa taga media gipadangat ni Maquilan   ang iyang pagpangayo og pasaylo ngadto kang Mayor Jonas Cortes ug kang city administrator James Abadia, city legal officer Giovanni Tianero ug pangulo sa enforcement unit nga si Edmund Maboloc.

Nagbasul siya nga nagpadala siya sa iyang imosyon niadtong higayona ug nahagit niya og away ang lider sa demolition team sa maong higayon.

Samtang si Tianero miingon nga ilang gidawat ang pagpangayo og pasaylo ni Kapitan Maquilan ug iyang gipasabot nga ang hinungdan nga gipaguba ang mga tangkal sa baboy ni Maquilan tungod kay ang maong lugar maoy tarokan sa Presinto 1 sa Mandaue City Police Office (MCPO) nga kasamtangang nag-antus sa hagip-ot kaayo nilang lugar sa ikaduhang andana sa karaang merkado.

Si Tianero midugang nga pabalhinon sila si Maquilan ngadto sa barangay Labogon diin atua ang modernong ihawan sa dakbayan mahimutang.  (BANAT NEWS)