One Cebu sa Toledo, LP sa Barili gidugok sa tawo

CEBU, Philippines - Malinawon ang katibuk-ang kahimtang sa   mga dakbayan ug kalungsoran sa lalawigan sa Sugbo atol sa usa ka semana nga pangalagad sa Commission on Elections (COMELEC) pagluwat sa mga certificate of candidacy (COC) ngadto sa mga kandidato nga molansar sa umaabot nga piniliay sa sunod tuig.

Si Vice Mayor Arlene “Daydee” E. Zambo sa dakbayan sa Toledo mibutyag atol sa interview sa DYMR Radyo ng Bayan Cebu nga gawas nga malinawon ang ilang dakbayan alegre pa kaayo dihang kaliboan sa mga molupyo   miduyog kanila sa pagsang-at nila sa ilang COC ngadto sa buhatan sa COMELEC   sa ilang siyudad niadtong Biyernes.

Matud pa ni Zambo nga nabati sa ilang grupo nga gipangunahan ni Mayor Aurelio “Rudy” P. Espinosa, nga iyang amahan, ang mainit ug madasigon kaayong pulso sa katawhan sa pagsuporta kanila. Kini tungod sa tinguha sa mga Toledohanon nga ikapadayon sa ilang administrasyon ang daghan kaayong kauswagan nga natagamtaman sa mga magbubuhis sa maong dakbayan. Busa matud ni Zambo nga  gumikan sa gipakita sa katawhan sa Toledo nga kahinangop ug pagduyog niini sa ilang pagsang-at sa ilang COC, bugtian usab nila og dugang pang mga serbisyo sa tanang aspeto sa panggobiyerno sama sa pag-atiman sa kalamboan sa dakbayan pinaagi sa infrastraktura, pag-atiman sa panginabuhi sa katawhan, panglawas, edukasyon, pamatigayon, panguma, pangisda ug tanang natad sa panlihok-lihok sa katawhan.

Gibutyag ni Zambo nga kauban niya ug ni Mayor Rudy Espinosa nga  mihandos sa ilang COC mao ang kompletong line-up sa mga kanidato sa pagka-konsehal ubos sa Bando Asenso Toledo One Cebu Party mao sila si Ricardo “Kuya Nick” Pepito, Joie P. Perales, Amelia Q. De Pio, Arturo “Boy” Mendoza Leo L. Dolino, Rolly Caburnay, Louis Espinosa, Jill Espinosa, Junjun Borja ug Nat-Nat Mercado Abellana.

Sa samang higayon si Mayor Teresito “Ondo” Mariñas sa lungsod sa Barili mapasalamaton kaayo sa mga Barilinhon kinsa kinasingkasing nga mibuluntaryo sa pagduyog kanila   sa pagpanon ngadto sa Comelec office sa Barili sa pagduso nila sa ilang COC niadtong Biyernes.

Matud pa ni Mariñas nga didto niya makompirmar nga ang taga Barili misimpatiya sa iyang grupo    nga naglangkob sa mga batid ug utokan nga mga   Barilinhon kansang damgo ug tinguha mao ang pagpalambo sa kahimtang sa Barili pinaagi sa mga infrastraktura ug pagpauswag sa panginabuhi sa mga lungsoranon.

Ang ubang mga konsehal    nga kauban ni Mariñas naglakip sa mga taga sector sa panglawas, edukasyon, panguma, pangisda ug tanang matang aspeto sa pagpuyo sa katawhan sa maong lungsod kansang mga ngalan iyang gibutyag sa kahanginan kagahapon sa   pakighinabi   sa DYMR kaniya.

Usa sa kandidato pagka-konsehal sa line-up ni Mariñas mao ang beterano nga magsisibya sa radio ug kanhi manager sa DYMR Radyo nga Bayan Rene V. Alquizola.  (BANAT NEWS)