Hulga kang Nierves gitun-an sa kapolisan

CEBU, Philippines - Gitun-an sa kapolisan sa dakbayan sa Talisay ang gibug-aton sa hulga   nga nadawat ni Edwin Nierves, ang consultant sa Ecological Solid Waste Management Collection and Transport sa maong dakbayan gikan sa mga vendor sa maong dakbayan.

Matud pa ni Supt. Eddie Recamara, hepe sa kapolisan sa maong dakbayan nga ila pang gisuta ang kamatuoran sa nadawat nga hulga ni Nierves sa pagpapahawa niini sa mga sidewalk vendor sa sitio Molave, barangay Tabunok sa maong dakbayan sa milabay’ng buwan.

Matud pa ni Ricamara nga kun mamatud-an niya nga bug-at ang maong hulga modestino siya og polis nga moguwardiya kang Nierves.

Gibutyag ni Nierves sa taga media nga adunay mga tawo nga mibahad kaniya nga pabantay-bantayon lang siya tungod kay adunay dili maayong mahitabo kaniya.

Apan matud ni Nierves nga wala niya kini ibutyag sa kapolisan tungod dili siya personal nga maoy nakadawat niini kundi   gikan sa iyang mga paryente   nga misumbong kaniya.

Si Nierves   sa sayo pa maoy gisangonan sa pagpanghakot sa mga vendors ngadto sa bag-ong merkado sa barangay Lagtang, sa maong dakbayan human korala ang karaang merkado   sa Tabunok.

Apan daghan ang mga vendors nga wala moadto sa merkado sa Lagtang apan didto maninda sa barangay   Molave   hinungdan nga nagtukod si Nierves og task force nga misuwsay og abog ug sa pagpapahawa sa nahisgutang   mga vendors sa miaging buwan apan misukol kini ug gani usa ka sakop sa maong task force napusilan sa maong higayon.

Giangkon ni Nierves nga dili malikayan nga bation usab siya og kahadlok lakip ang iyang pamilya ug gani   mihangyo kini kaniya nga paundangon na lang sa iyang trabaho.

Si Recamara sa iyang bahin, nagkanayon nga wala makigkita kaniya si Nierves bahin niining isyu   sa pagpanghulga kaniya.

Matud usab sa hepe nga matag semana   kanunay silang magkakita sa mga meeting sa city hall apan wala gyud kini mosulti kaniya.

Hinuon matud sa hepe nga may sangonan   siya nga intelligence officer sa paghimo og evaluation sa maong hulga kung unsay gibug-aton niini.

Ug kung masuta niya nga namiligro gyud ang kinabuhi ni Nierves posibleng   pa-eskortan kini niya og polis.  (BANAT NEWS)