Militante mipasangil nga ilegal ang pagdakop sa magtiayon

CEBU, Philippines - Mokabat sa dul-an 50 ka mga militante ang misulong sa Cebu City Police Office agi og pagpakita sa ilang suporta sa magtiayong gipasanginlang mga opisyal sa New People’s Army ug mipasangil sa mga awtoridad nga ilegal ang pagdakop sa duha.

Ang mga militante nagbitbit og banner nga may gipatik nga nagmando sa kapolisan nga pabuhian ang magtiayong sila si Calixto Vistal ug Jimmyliza Badayos.

Ang tigpamaba sa mga militante nga si Dennis Abbarientos mibutyag nga ilang gihulagway nga “abduction” ang nahitabo sa duha ug ilegal ang pagbilanggo kanila kay dunay mga tawong makapamatuod nga inosente sila sa alegasyong gibato sa duha.

Ang hepe sa City Intelligence Branch (CIB) Chief Insp. Romeo Santander mipasabot usab nga iyang girespeto ang mga pamahayag sa kabanay sa mga dinakpan apan giklaro niyang legal ang pagdakop sa duha ug may basehan.

Ang duha gidakop sa mga operatiba sa CCPO ug sa mga sakop sa Central Command didto sa Mandaue niadtong milabay’ng adlaw pinasikad sa warrant of arrest sa kasong murder ug paghupot og armas. Ang miisyu sa warrant of arrest mao si Judge Roderick Maxino sa RTC Negros Oriental, wala hinuon iklaro sa mga awtoridad kung ang maong mga warrant giusa ra o managlahi.

Karong adlawa gikatakdang dad-on ang duha aron ipresentar sa sala sa maong hukmanan sa dakbayan sa Dumaguete. Ang duha giingong adunay mga posisyon isip mga opisyal sa NPA sa Negros. Samtang ang tigpamaba sa Central Command (CentCom) Lt. Col. Christopher Tampus nagkanayon nga ilang gipaneguro nga napanalipdan ang katungod sa mga suspetsado. (BANAT NEWS)