Nahay-ad sa hantakan

CEBU, Philippines - Patay diha diha ang 36-anyos nga lalaki human kini gilipot sa luyo ug gipusil sa ulo ug dughan diha sa hantakan sa sitio Fatima sa barangay Jubay lungsod sa Liloan kagahapon sa alas 2:30 sa kaadlawon.

Ang biktima nga wala na madala pa sa tambalanan mao si Vic Tayong Noval alyas Amad, 36, way klarong trabaho kansang ulo mituasik diha sa hantakan human sa pagpusil.

Ang mga sugarol ug ubang mga nakakita sa hitabo miingon nga duha ka mga wala mailhing lalaki nga nagsuot og kawo ug nagsakay og motorsiklo ang mipusil sa biktima, walay nakakuha sa plate number sa motor matud pa sa mga imbestigador.

Sumala ni SPO4 Wendrie Pilapil sa Liloan Police Station dihang nahinabi sa Banat News nagbarog nga nanugal diha sa hantakan si Noval dihang miabot ang usa ka motorsiklong dunay luwang duha ka mga lalaki.

Matud pa ang angkas sa motor mikanaog ug milipot sa luyo sa biktima ug gidul-itan ang luyong bahin sa ulo og armas dayong pusil niini.

Tungod sa hitabo naalibwag og panagan ang mga sugarol ug nag-iyahay sa pagpanagan ug tago.

Ang biktima nga naigo sa luyong bahin sa ulo nga milapos sa atubangan nahagba sa hantakan ug dihadiha gitiwasan pagpusil tumong sa dughan. Gikatahong gitan-aw pa gyud og maayo sa mamumuno kung buhi pa ang biktima una kini mibalik og angkas sa motorsiklo.

Matud pa nga ang nagmaneho sa motorsiklo nga nagpaabot sa gunman diha sa motor nagkupot usab og wala matinong kalibre sa armas.

Ang kapulisan padayun pa sa ilang imbistigasyon pag-ila sa suspek ug motibo sa krimen apan lakip sa gisubay nga anggulo sa imbestigasyon mao ang giingong pagkadaghang nakaaway sa biktima sa maong dapit ug gisusi usab sa kapolisan ang impormasyong nalambigit ang biktima sa pagpatay kaniadto. (/EIM) (BANAT NEWS)