Mimolestiya sa 12 anyos priso

CEBU, Philippines - Nagtingkagol sa Bantayan Police Station ang usa ka 46-anyos nga ulitawo human kini pasanginling mimolestiya   sa 12-anyos nga dalagita    sa maong lungsod niadtong Huwebes sa tungang gabii.

Si PO1 Lia Balog sa Women and Children Protection Desk (WCPD) sa Bantayan Police Station mibutyag nga sa wala pa ang hitabo ang biktima giingong naglingkod   sa usa ka lingkoranan   sa gawas sa diskohan sa usa sa mga barangay sa Bantayan.

Ang suspetsado   nga si Bernard Batarilan, 46, nga taga barangay Luyong Baybay sa maong lungsod , giingong   ilado na kaayo   nga tiggamitan og ginadiling drugas kalit lang mitungha ug miduol sa bata, dayon gibaatan sa iyang t-shirt ang baba sa biktima   hinungdan nga wala na kini makatingog   ug giguyod ngadto   sa ngitngit nga bahin sa maong lugar   ug giingong gihilabtan sa iyang tudlo ang kinatawo sa biktima

Matud ni Balog nga mikisi-kisi pag-ayo ang bata hinungdan nga nakalingkawas kini gikan sa suspetsado ug midagan   nga nagsiyagit   nga nagpakitabang apan walay nakadungog   kay mingaw ang maong lugar.

Hinuon nakabalik kini sa diskohan   diin didto ang iyang inahan nga naninda og barbecue ug human isugilon ngadto sa iyang inahan ang nahitabo kaniya, gitaho usab dayon kini sa inahan ngadto sa kapolisan .

Milihok dayon ang kapolisan          sa pagpangita sa suspetsado   ug nadakpan kini niadtong Biyernes sa udto didto sa barangay Surangan, Bantayan ug gikatakdang pasakaan og kasong kalapasan sa Akta Republika 7610 kon “Violation Against Women and Children”. (/WC) (BANAT NEWS)