Gipusil sa dughan, liog, aping patay

CEBU, Philippines - Namatay ang usa ka 22-anyos nga lalaki human kini pusila sa duha ka wala hiilhing kriminal kagahapon didto sa sitio Tumoy Dawis, barangay San Roque, dakbayan sa Talisay alas 8:00 pasado sa buntag.

Ang biktimang si Michael Cainglit, residente sa maong dapit nakaangkon og samad pinusilan sa walang dughan, walang liog ug walang aping.

Si SPO4 Daniel Tarucan ang imbestigador sa maong insidente sa pakighinabi sa Banat News kagahapon nagkanayon nga personal nga bangi ang usa sa ilang gitutokang motibo sa maong pagpamusil tungod kay ang biktima adunay   gikaaway kaniadto.

Matud niya nga sa wala pa pusila si Cainglit nagbarug-barog pa kini sa daplin sa karsada sa maong dapit   dihang kalit lang mitungha ang usa ka kolor itom nga XRM nga motorsiklo nga gisakyan sa duha ka wala hiilhing mga lalaki.

Dayon nanganaog kini sa sakyanan ug miduol sa biktima dayong pusil niini.

Giingong ang pusil sa usa ka kriminal wala makabuto kay mikagar ug bisan giunsa pagkablit ang gatilyo niiini wala gyud makabuto.

Hinuon ang kauban niini mao gyu’y nakapatay sa biktima tungod kay wala mabalda ang mga buto niini.

Giingong dihang paingon nang mosakay og balik sa motorsiklo ang maong mga kriminal usa kanila ang misulti nga “patay na si Michael”.

Gisakwat sa mga estambay ang biktima ug gihatod ngadto sa Talisay City District Hospital apan gideklarar kining patay na sa pag-abot didto.

Si Tarucan midugang nga natahap silang kaila sa biktima ang maong mga kriminal.

Ang kapolisan nagpahigayon og follow-up operation sa maong hitabo. (/WC) (BANAT NEWS)