CEBU, Philippines - Nagpakamatay pinaagi sa paghikog ang usa ka welder nga gituohang may labot sa iyang hinigugma didto sa Sitio Cambiohan, barangay Casili, lungsod sa Consolacion kagahapon sa ala 1:00 sa hapon.
Ang nagpakamatay mao si Gerson Sasing, 24 , ulitawo, ug nagpuyo sa maong lugar apan nagtrabaho isip welder sa Metaphil sa Taganito Mining sa Surigao Del Norte.
Si PO2 Johnaskie Romero sa Consolacion Police Station mibutyag sa Banat News nga ang uyoan niini nga si Danilo Tibon, hingkod, maoy nakadiskobri nga nagbitay na ang iyang pag-umangkon nga wala nay kinabuhi ilawom sa punoan sa mangga duol sa gipuy-an niini kansang liog gibalikosan og kawo sa bag nga gisumpay-sumpay ug didto igaid ang pikas tumoy sa sanga sa mangga. Nabasahan sa mga polis nga miresponde sa maong alarma ang text message sa iyang cellphone ang pulong “you” sa iya ra usab nga phone number.
Gituohan sa kapolisan nga may kalabotan ang maong hitabo sa relasyon sa naghikog sa dalagitang uyab nga ila ra usab nga silingan.
Nasayran nga gitakda na untang mobalik ang biktima sa Surigao tungod sa iyang trabaho human kini mobakasyon og pipila ka adlaw apan wala na makalarga kay nagpakamatay man.
Ang mga kabanay niini mibutyag sa kapolisan nga nagpakahilom kini ug wala gayud makasulti sa iyang problema ngadto kanila busa wala nila hisayri ang lintunganay sa paghikog sa maong ulitawo. (/WC) (BANAT NEWS)