CEBU, Philippines - Ang University of the Visayas (UV) kinsa tua karon sa Uropa, nagpakita og maayong sinugdanan kay kining nabantog na kaayo nga grupo nakabaton dayon og kalampusan sa una nilang paghunong sa dinugtong ug kutay sa mga kompetisyong internasyonal.
Katloan ka mga membro sa UV Chorale, ang grupo nga naugmad dinhi sa Sugbo nga naglakip sa ilang conductor nga si Anna Tabitha-Piquero sa pagkakaron atua sa karaan kaayong siyudad sa Roma nga mao ang Rimini sa Italya alang sa 2012 Rimini International Choral Competition.
Ang UV Chorale midaug sa ikaduhang ganti, o katumbas sa usa ka Gold Diploma sa Sacred Music Category. Ang maong bangga nagsugod niadtong Biyernes ug matapos usab karon, Oktobre 7.
Ang grupo sa mga mag-aawit nga nagbase dinhi sa Sugbo mosalmot sa sangka ubos sa Folk o Gospel/Spiritual category.
Ang official website sa Rimini International Choral Competition milista sa mga nasud nga maoy ikasangka sa UV Chorale nga maglakip sa Germany, Czech Republic, Poland , Croatia, Ukraine , Belarus, Japan, United Kingdom, Norway, Russia, Italy, Georgia. Macedonia, Estonia, Serbia, Slovenia, Russia, Bulgaria, Indonesia, Norway, Romania, Mexico uig Hungary.
Human unya sa Italya, ang UV Chorale molarga na usab paingon sa Barcelona, Spain unya sa Oktobre 17-21 alang sa Cantaal Mar Choir Competition. Unya sa Oktobre 31-ngadto sa Nobiyembre 4 mobiyahe na usab sila ngadto sa laing siyudad sa Espania alang sa ika-44 nga Tolosa Choir Competition.
Ang UV Choir mao lamang ang bugtong ug nag-unang Sugboanon nga grupo sa mag-aawit nga nakalipikado nga gidapit sa mga dinugtong nga bangga sa kanta sa nagkalainlaing nasud sa Uropa gikan sa Oktobre ngadto sa Nobembre ning tuiga.
Sila usab ang unang Sugboanong grupo sa mag-aawit nga gidapit sa pagkanta sa usa sa mga misa alang sa Kanonisasyon ni Beato Pedro Calungsod didto sa Roma karong Oktubre 21. (BANAT NEWS)