CEBU, Philippines - Usa ka barangay tanod sa barangay Kamagayan nga kaniadto gidakop sa Philippine Drug Enforcement Agency-7 tungod sa ilegal nga drugas ug paghupot og armas apan na-acquit ang gipusil patay sa tulo ka lalaking nagmotorsiklo pasado alas-7 sa miaging gabii diha sa dalan Sanciangko sa maong barangay.
Ang biktima nailhan nga si Hermogenes ‘Boy’ Borres, 56, tanod sa maong lugar nga nakaangkon og samad pinusilan sa dughan, tuong bahin sa iyang lawas ug tuong bukton.
Sa imbestigasyon sa kapolisan nasayran nga ang biktima nakig-estorya sa impormanteng si Eduardo Filosopo, 48, daplin sa karsada sa dihang kalit lang nga adunay usa ka motorsiklong mibutho sakay ang tulo ka wala mailhing tawo.
Sa kalit lang, usa sa mga back rider ang mikanaog ug walay igong hinungdan kalit mipaulan og bala ngadto sa biktima kinsa nahagba ug nangikyas ang tulo.
Gidali pagdala sa Cebu City Medical Center ang biktima apan namatay ra usab kini pipila ka minutos ang milabay.
Nakuha sa crime scene ang tulo ka kabhang sa kalibre .45, gisubay pa sa kapolisan ang motibo sa krimen.
Ang biktima kanhi hepe sa tanod sa maong barangay nga niadtong Hulyo 2010 nasikop sa mga sakop sa PDEA-7 tungod sa ginadiling drugas ug armas.
Gihimakak ni Borres ang pasangil sa PDEA ug mipasangil nga ‘planted’ ang shabu ug armas nga giingong nakuha kaniya.
Matud pa ni SPO4 Alex Dacua sa Homicide Section base sa ilang impormasyong nakaylap na-acquit si Borres sa maong kaso. (/EIM) (BANAT NEWS)