Magtiayong 'NPA leaders' sikop

CEBU, Philippines - Nasikop ang magtiayong gipasanginlang mga opisyal sa rebeldeng New Peoples Army pinasikad sa warrant of arrest sa kasong murder pasado alas- 5 sa miaging hapon diha sa barangay Subangdako syudad sa Mandaue.

Ang mga nasikop mao ang magtiayong Calixto Vistal nga giingong may mga alyas nga Isok ug Cocoy nga giingong leader sa Platoon Energen, Komiteng Rehiyon Sentral Bisayas (KRSB) ug ang asawa niining si Jimmyliza Badayos nga adunay alyas nga Jill, Cecil, ug Mayet nga kanhi lider sa Communication/ Technical Bureau sa KRSB ug kasamtangang nagtrabaho sa usa ka kompanya.

Ang tigpamaba sa Central Command nga si Lt. Col. Christopher Tampus, mibutyag nga pinaagi sa hiniusang operasyon sa kapolisan sa syudad sa Sugbo ug 2nd Special Forces Battalion ilang gitunol ang warrant of arrest batok sa duha.

Matud pa ni Tampus nga warrant of arrest giluwatan ni Negros Oriental RTC Judge Roderick Maxino sa Negros. Hinuon wala makahatag si Tampus og detalye kung kanus-a ug asa nahitabo ang giingong pagpatay. Si Vistal adunay kasong murder hinungdan nga nalutsan kini og warrant of arrest samtang ang asawa niining si Liza Badayos nag-atubang usab sa kasong illegal possession of firearms and explosive (granada).

“ The new commander of Centcom Rear Admiral Jose Luis Alano highly commended the successful joint operation of the CCPO and 2SF BN in arresting two leaders of the NPA in Negros Oriental,” matud pa ni Tampus sa text iyang gipadala sa Banat News.

Apan sila si Badayos ug si Vistal mipasangil nga ilegal ang pagsikop kanila tungod kay gikatahong gisignit lang sila ug gipasakay sa van ug giingnang arestado sila ug wala gyud mopasabot kanila kung unsay rason sa ilang pagkaaresto.

Butyag usab ni Badayos nga niadtong dekada 80 gironda ang ilang panimalay sa kapolisan ug ang tibuok banay gidala sa police station samtang ang ilang amahan gisikop ug gibalhog sa karsel tungod sa pasangil nga usa kini ka lider sa mga rebelde apan gikakurat na lang sa ilang pamilya tungod kay pagkaugma gipahibalo na lang silang nakaikyas ang ilang amahan apan hangtud karun wala pa makita.

“Ibuwag gani unta ming duha but wala gyud ko mosugot kay mapareha unya sa akong papa sa una gilahi nila og detention cell pagkaugma ilang gi-declare nga nakaeskapo, hangtod karon missing gihapon,” pasabot pa ni Badayos dala ang kabalaka.

Si Tampus mipasabot nga wala silay nahimong kalapasan sa pagsikop sa duha.

“The arrests of the two suspects were done in accordance with the law, the arresting authorities have the legal and valid warrant of arrest, rules and procedures in effecting the arrest were strictly followed. The constitutional rights of the suspects were not violated in doing the arrest,” matud pa ni Tampus sa gipadala niining text.( /EIM) (BANAT NEWS)