TampUsisok sa Team Rama ug BOPK

CEBU, Philippines - Gidumog sa mga tawo ang buhatan sa Commission on Election sa Siyudad sa Sugbo kagahapon atol sa pagduso sa ilang certificate of candidacy (COC) sa mga kandidato sa Team Rama ug Bando Osmeña Pundok Kauswagan.

Ang Team Rama nga gipangulohan ni Mayor Michael Rama mihandos sa ilang COC kagahapon sa buntag.

Gisugdan nila kini pinaagi   sa usa ka motorkada gikan sa usa ka hotel sa Ayala Business Park padung na ngadto sa Cebu Metropolitan Cathedral diin gipahigayon ang usa ka santos nga misa nga gipangulohan ni Msgr. Boy Alesna.

Human sa misa, nagpanon ang mga kandidato sa Team Rama uban sa dul-ang lima ka libo ka mga   supporter paingon sa buhatan sa Comelec.

Ang Team Rama uban sa mga supporters pulos nagsul-ob og   yellow ug green nga senina uban sa mga placards nga may hulagway sa ilang mga kandidato. Si Konsehal Edgardo Labella maoy runningmate ni Rama, samtang ang ig-agaw sa mayor nga si Annabelle Rama maoy kandidato pagka-kongresista sa north district.

Ang mga kandidato pagka-konsehal sa Team Rama sa north district naglangkob kanila ni   City Traffic Operations Management Board Chairman Sylvan “Jack” Jakosalem, kanhi konsehal Edwin Jagmoc, Busay Barangay Captain Eliodoro Sanchez, Agsungot Barangay Captain Pastor Alcover II, Sambag I Barangay Captain Jerry Guardo, Ermita Barangay Councilor Felicisimo Rupinta, Lahug Barangay Councilor Mary Ann Delos Santos, ug Bobby Vicente Kintanar.

Samtang si Atty Aristotle Batuhan usab ang kandidato sa Team Rama sa pagka-kongresista sa south district ug ang line-up sa pagka-konsehal naglangkob kanila ni   kanhi konsehal Procopio Fernandez, James Cuenco, Basak Pardo Barangay Captain Dave Tumulak, Poblacion Pardo Barangay Councilor Althea Lim, Inayawan Barangay Councilor Lotlot Ignacio, Atty. Hans Abella, Ronald Diola ug Tisha “Inday Tikay” Ylaya.

Sa pagkahapon, ang BOPK na usab ang miduso sa ilang COC apan mitambong usab sila og misa sa Cebu Metropolitan Cathedral sa wala pa sila misulod sa buhatan sa Comelec. Ang grupo gipangulohan ni Kongresista Tomas Osmeña   ug sa iyang runningmate nga si Bise Mayor Joy Augustus Young.

Uban usab ang ilang kandidato sa pagka-kongresista   sa north district nga si Raul del Mar   ug Konsehal Rodrigo Bebot Abellanosa sa south district. Ang mga kandidato nila sa pagka-konsehal sa north mao sila si kanhi Konsehal Nestor Archival , Konsehal Lea Japson, Nida Cabrera, Alvin Arcilla, T. Padilla Barangay Captain ug presidente sa Association of Barangay Council Michael Ralota, Konsehal Noel Wenceslao, Sisinio Andales, ug Alvin Dizon.

Samtang ang mga konsehal nila sa south district mao sila si kanhi konsehal Gerry Carillo , Gabby Leyson, Cogon Pardo Barangay Captain Eugenio Gabuya, Labangon Barangay Councilor Zenaida Amores, Konsehal Augustus Pe Jr., Roberto Cabarrubias, Richard Osmeña, ug Margarita Osmeña.  (BANAT NEWS)