Priso miinom og muriatic

CEBU, Philippines - Usa ka piniriso sa Daanbantayan Police Station ang nagpakamatay pinaagi sa pag-inom og muriatic acid niadtong Huwebes sa hapon, ang adlaw nga gitakda nga ibalhin na unta siya sa Medellin District Jail, sa Barangay Poblacion, Daanbantayan.

Si Gavino Siangko Jr., 55, taga-Bragat Compound, Barangay Maya, daling gidala sa Daanbantayan District Hospital nga nangluspad ug nagping-it sa kasakit sa tiyan apan gideklarar siya nga patay duha ka oras ang milabay.

Matud pa nga naguol si Siangko human mahibaw-i nga ibalhin siya sa Medellin District Jail nga nahimutang sa Barangay Caputatan Sur, Medellin anang alas 4:00 sa hapon.

Ang commitment order ni Siangko gi-issue ni Judge Antonio Marigomen, Regional Trial Court Branch 16 sa Barangay Dakit, Bogo City.

Matud ni PO3 Alfredo Mandal, imbestigador sa Daanbantayan Police Station, nga gidala nila si Siangko ug laing duha ka piniriso nga sila si Geraldo Marikit ug Armel Aligato sa Municipal Rural Health Unit alang sa medical examination nga maoy rekisitos sa gikinahanglan sa pagbalhin sa mga priso og laing pasilidad.

Sila si SPO3 Herminio Marinduque, duty jailer, ug PO2 Ressan Moralde, patrol driver, nakamatngon nga nagping-it sa kasakit sa tiyan si Siangko hinungdan nga gidala kini sa district hospital diin siya gi-deklarar nga patay. “Nagduda na gyud mi nga naghilo siya sa iyang kaugalingon,” matud ni Mandal, diin sa gihimong inspeksyon sa prisohan dunay nakit-ang gamay’ng botelya nga dunay sulod nga gituohang muriatic acid.

Nagduda si Mandal nga gikuha ni Siangko ang maong muriatic acid nga gigamit sa paglimpyo sa lama-lama sa salog sa ilang bag-o nga building.

Si Mandal midugang nga sa miaging adlaw samtang nagduwa og baraha si Siangko mitug-an kini sa iyang kauban nga sila si Rodulfo Cataluna ug Gino Pepito nga maghikog kini sa higayon nga ibalhin siya sa Medellin.

Si Siangko naaresto niadtong Septiyembre 14 human makalapas sa Section 5 sa RA 9165 o Dangerous Drugs Act of 2002. (/EIM)  (BANAT NEWS)