Tindero og pan gitulis, gipatay

CEBU, Philippines - Usa ka mamaligyaay og pan ang patay nang nakit-an human kini dunggaba ug bunali sa duha ka mga lalaki samtang namaligya og pan sa Cañete Compound, Barangay Poblacion, Liloan kagahapon sa buntag.

Apan pipila ka oras ang milabay nasikop sa kapulisan ang giingong duha ka responsable sa krimen nga sila si Virgilio Sayre, 23, ug ang 17- anyos nga kauban niini nga taga-Barangay Jubay. Ang biktima nga si Roger Sasing, minyo, taga-Sitio Dapdap, Barangay Catarman, ug kanhi miyembro sa Barangay Intelligence Network (BIN), nakaangkon og samad dinunggaban sa iyang liog ug tiyan samtang ang iyang halin nga P820 giingong gidala usab sa mga suspetsado.

Sa imbestigasyon sa kapulisan, si Sasing sakay sa iyang bisikleta namaligya og pan sulod sa compound dihang giatangan sa duha ka mga tulisan apan dihang misukol ang biktima gidunggab kini ug gibunalan ang nawong.

Daling mitawag og pulis ang barangay tanod sa maong lugar pagkahibalo sa nahitabo hinungdan sa pagkaaresto sa duha.

Si Chief Insp. Richard Oliver, Liloan chief, mibutyag nga dili pa nila masiguro ug si kinsa sa duha ang midunggab ug mibunal kang Sasing kay nagtulod-tulod na kini.

Apan human sa pagkasikop sa duha gikatahong dunay biktima sa carnapping ang mitudlo usab sa maong mga suspek nga maoy mikawat sa iyang motorsiklo. Nagtingkagol na karon ang duha ka suspek sa karsel sa kapulisan sa Daanbantayan samtang kasong robbery with homicide ug carnapping ipasaka batok kanila.( /EIM) (BANAT NEWS)