Mga abogada sa Asia miduaw sa Sugbo

CEBU, Philippines - Kagatusan ka mga abogada gikan sa nagkalainlaing nasud sa Asia mibisita sa Sugbo ug mitambong sa duha ka adlaw nga Federacion Internacional de Abogadas (FIDA) Asian Regional Convention sa miaging adlaw

Sigon pa ni manlalaban Sheila Anish ang executive counsel sa FIDA nga dili lang mga abogada ang ania sa Sugbo kundili mga huwes usab   nga mga babaye gikan sa nasud sa Singapore, India, Sri Lanka ug may gikan usab sa Italy.

Sumala pa ni manlalaban Anish nga gipili nila ang Sugbo alang sa ilang dakong kalihukan niining tuiga tungod kay komportable silang mobisita dinhing dapita sanglit managsama man ang matang sa kultura sa Sugbo ug sa ilang tagsatagsa ka nasud.

Si manlalaban Christina Garcia Frasco ang Capitol Consultant on Programs and Projects Institutionalization, maoy midawat sa mga sakop sa FIDA sa Kapitolyo sa dihang mihatag kini og kurtesiya sa buhatan ni Gobernador Gwendolyn Garcia kinsa may opisyal nga biyahe sa mga kalungsoran sa maong higayon.

Didto gisaysayan sa anak sa gobernador ang mga bisita nga abogada bahin sa programa sa iyang inahan nga may labot sa kababayen-an ug kabataan.

Sama sa naandan gipatagamtam ngadto sa mga bisita ang kulturanhong mga programa nga Sugboanon   sama sa sayaw ug kanta nga gihangop pag-ayo sa mga bisita.

Human sa presentasyon sa mga Sugboanon, gisunod ang fellowship sa mga sakop sa FIDA nga giduyogan gihapon sa sayaw   ug kanta sa taga India ingon man comical skit sa mga taga Sri Lanka. (/WC)  (BANAT NEWS)