500 vendors sa Carbon Market ibalhin sa ML Quezon Ave.
CEBU, Philippines - Temporaryo nga ipahimutang diha sa ML Quezon Avenue sa Carbon Market Area ang kapin sa 500 ka mga market vendors sa Carbon Unit 2 sa sunod semana nunot sa P350 milyones nga konstruksyon sa ikaduhang andana niini.
Si Cebu City Market Administrator Raquel Bohol-Arce miingon nga malampuson ug malinawon ang panagtigom sa mga leader sa market vendors kagahapon.
Kahinumduman nga nasunog ang maong merkado 15 ka tuig na ang milabay apan wala dayon mapaayo gumikan sa mga teknikal nga problema.
Giingong P170 milyones lang ang naaprobahang budget alang sa maong proyekto apan gipasalig ni Arce nga mangayo ang iyang departamento og dugang P100 milyones nga budget niini sunod tuig ug ang kuwang ilaha usab anamon og pangayo.
Dugang pa ni Arce nga kinahanglan na gyud nga sugdan ang konstruksyon sanglit ang mga market vendors ra usab ang makabenepisyo niini sa higayon nga mahuman na ang proyekto.
Gipasalig hinuon ni Arce nga dili maghuot ang dalan alang sa mga sakyanan sa higayon nga mabalhin ang mga vendors sa ML Quezon Avenue. (BANAT NEWS)
- Latest
- Trending
