San Fernando buot ipa-Comelec Control sa 2013

CEBU, Philippines - Nunot sa kainit sa politika sa lungsod sa San Fernando ang kampo sa mga Reluya miawhag sa Comelec nga ipaubos sa Comelec control ang ilang lungsod sa umaabot eleksiyon sa sunod tuig.

Kagahapon sa buntag ang magtiayong Lakambini “Neneth” ug Ricardo “Nonoy” Reluya mibutyag sa mga tigbalita sa ilang tinguha nga ipaubos sa Comelec control ang ilang lungsod tungod sa kahigpit sa kompetisyon sa mga kandidato. Ang mga Reluya kaalyado kini sa Alayon-Nacionalista Party.

Kahinumduman nga niadtong 2010 Elections dunay nahitabong tensyon tali sa kampo sa mga Reluya ug incumbent Mayor Antonio “Abby” Canoy nga kaalyado sa Liberal Party.

Ang San Fernando gikonsiderar sa kapolisan ug Comelec kaniadto nga usa sa “election hot spot” tungod sa kahigpit sa panagribal sa duha ka politiko ug gikabalak-ang subling motumaw ang susamang tensyon karong sunod tuig.

Ang mga mokandidato sa mga lungsod sa unang distrito nga mao ang Minglanilla, San Fernando ug Sibonga gikatakda karong adlawa mo-file (Biyernes) sa ilang certificate of candidacy (COC).

Ang magtiayong Reluya wala pa makahukom kung kinsa kanilang duha ang modagan isip mayor ug bise mayor sa lungsod. Si Ricardo kinsa maoy kapitan karon sa barangay Panadtaran nagkanayon nga kompleto na ang ilang tiket ug andam na sila sa eleksiyon sa sunod tuig.

Sa sunod tuig eleksiyon makaatbang sa magtiayong Reluya ang amahan ug anak nga si Abby ug Miko Canoy kinsa maoy modagang mayor ug bise mayor sa sunod tuig nga eleksiyon.

Ang Banat News misuway og tawag kagahapon kang Mayor Canoy aron makuhaan og pamahayag kabahin sa awhag sa mga Reluya nga ipaubos sa Comelec control ang San Fernando apan walay motubag sa telepono niini.

Kahinumduman nga niadtong tuig 2010 nga eleksiyon si Mayor Canoy supak sa awhag sa mga Reluya nga ipa- Comelec control ang ilang lungsod. 

Si Reluya aduna pay pending nga election protest batok ni Canoy ug hangtud karon wala pa maresolba.

Si Provincial Comelec officer Lionel Marco Castillano nga nahinabi sa mga tigbalita nagkanayon nga nakadawat siya og request kaniadto gikan sa lungsod sa San Fernando nga ipaubos ang lungsod sa Comelec control.

Apan gipasabot ni Castillano nga himuon lang kini isip “last resort” kung dili gyud mahimong malamposon ang eleksiyon sa usa ka lugar tungod sa mga bayolenteng panghitabo.

Matud ni Castillano nga gipangandaman na nila kini pinaagi sa pagpadala og dugang mga polis sa mga lugar nga dunay tensyon tungod sa eleksyon. (Brenda D. Batuto/EIM)

Garcia-Magpale maoy paluyohan sa Alayon

Ni Brenda Batuto

Gikompirma kagahapon ni Kongresista Eduardo Gullas sa unang distrito sa probinsiya nga si Kongresista Pablo John Garcia sa ikatulong distrito nga ubos sa One Cebu Party maoy ilang suportahan sa pagka-gobernador sa eleksiyon sa sunod tuig.

Samtang si Bise Gobernador Agnes Magpale nga United National Alliance (UNA) maoy ilang suportahan sa pagka-bise gobernador.

Sa umaabot eleksiyon sunod tuig ang kanhi bise mayor sa dakbayan sa Danao nga si Boboy Durano maoy tandem ni PJ samtang si Magpale ka tandem ni Hilario “Junjun” Davide III kinsa magpapiling gobernador ubos sa Liberal Party (LP).

Si Gullas sa pakighinabi sa mga tigbalita mipasabot nga si Magpale suod sa ilang pamilya diin ang inahan ni Magpale prinsipal sa Danao Visayan Institute nga tunghaan sa amahan ni Eddiegul.

Matud ni Eddiegul nga niadtong higayona dihang gipili nilang suportahan si Magpale wala pa sila makahibawo kung kinsay running mate ni PJ.

Gibutyag ni Eddiegul nga ang pamilyang Durano suod usab niya ug gani si Boy Durano nga amahan ni Boboy Durano mitawag kaniya ug giingong nagkanayon nga dili niini pasanungon ang iyang anak nga mokandidato kung dili mananghid kaniya (Eddiegul) tungod kay ang Kongresista kaniadto mananghid gyud kini sa ilang amahan (sa mga Durano) kung mokandidato. (BANAT NEWS)