Gipatay sulod sa jeepney

CEBU, Philippines - Wala na makaabot pa sa tambalanan ang usa ka fruit vendor human kini gipusil sa usa sa tulo ka lalaking nagmotorsiklo nga gidudahang nalambigit sa ilegal nga drugas pasado alas- 4 sa kaadlawon diha sa dalan Katipunan sa barangay Labangon, dakbayan sa Sugbo.

Ang biktima nailhan nga si Manuel Dela Concepcion, 38, molupyo sa sitio Kalangyawon, barangay Napo sa syudad sa Carcar.

Sa imbestigasyon sa kapolisan nasayran nga ang biktima uban sa iyang paryenteng si Renato Lauronillo sakay og jeepney patubang sa barangay Labangon dihang kalit nga gibabagan sa motorsiklong may sakay nga tulo ka lalaki ang maong sakyanan.

Dihang mihunong ang jeepney kalit nga mikanaog si Lauronillo ug mikaratel og dagan ug nabilin ang biktima kinsa maoy nalili-an sa mga mamumuno diha sa sulod sa jeepney dayong kalit nga gipusil sa dughan.

Ang drayber sa maong jeepney nga si Rolando Rabanes dali nga midala sa biktima lahos sa Labangon Barangay Hall diin kini gikuha sa miresponding mga sakop sa Emergency Responding Unit Foundation (ERUF) apan gideklarar kining patay na.

Sa pakighinabi sa Banat News ni SPO3 Rey Cuyos, sa Cebu City Police Office, Homicide Section, mibutyag kini nga ilang nahinabi si Lauronillo ug nagduda sila base sa pamahayag niini nga may kalambigitan sa ilegal nga drugas ang motibo sa krimen.

Nakuha sa crime scene mao ang usa ka kabhang sa bala sa kalibre .45 samtang nakuha usab sa mga kamot sa biktima ang wallet nga adunay kantidad nga P890 duha ka tin foils, usa ka cellphone, lighter ug timbangan. (BANAT NEWS)